尼馬轉會風波又再捲起，巴黎聖日耳門（PSG）總監李安納度喺上星期六證實，正就尼馬轉會進行討論，不過否認已同巴塞隆拿或皇家馬德里達成任何共識，而尼馬亦唔會喺星期日PSG對尼姆嘅法甲比賽候命。據悉皇馬喺買唔到保羅普巴後會更加積極斟介尼馬，加上巴塞一直冇提出打動到PSG嘅交易條件，令尼馬本人都開始考慮轉投皇馬嘅可能性，放棄回歸巴塞嘅諗法。不過皇馬要收購尼馬，點樣滿足後者嘅薪金要求將會係一大難題。
尼馬家陣喺PSG嘅年薪高達稅後3,500萬歐元（約3.1億港元），由於西班牙同法國稅率唔同，若尼馬回歸西甲要拎到同樣嘅稅後薪金，皇馬就要開出稅前7,000萬歐元（約6.2億港元）嘅誇張合約，加上向PSG索價至少1.8億歐元（約16億港元）轉會費，係皇馬羅致尼馬嘅最大障礙。
另外據意大利多間傳媒報道，如果PSG賣得成尼馬，就會着手收購祖雲達斯球星戴巴拿（圖）。