午飯後行街，在IFC碰到一位醫生K，講句Hi之後，左丁山問佢：「現在係下午醫務所診症時間，點解咁有閒情嚟IFC行商場？」醫生K笑住講：「唔知點解，呢排連睇病嘅人都少咗，今日到四點先至有一個appointment，咪偷空走嚟IFC買啲靚茶點，靚麵包做下午小吃囉。」平時醫生K睇手腳損傷病，忙得透不過氣來，佢竟然在大量年輕人手腳骨折受傷之際，有時間行街，實在少有。醫生K話：「年輕人受傷，一來唔會有錢到中環睇醫生，二來我聽到佢哋唔敢去睇醫生，驚住醫生查問傷勢，然後報警。老實講，我哋醫生睇病醫人，點會去報警吖！年輕人唔使驚嘅，講到診金，我哋其實視乎情況，未必會向年輕人收錢嘅！」
醫生K又透露，不少醫生捐款畀一個612基金，該基金迅速籌得幾千萬元，用錢在兩方面，（一）為傷者療傷；（二）為被控年輕人聘用律師為佢哋上庭辯護，但大概有溝通問題或者年輕人唔敢露面求助，至今少見有人請基金援助。佢既然講起，左丁山問：「據報有大學生被捕，單是中文大學已有八名，佢哋可有申請612基金援助？」醫生K話：「何秀蘭等係呢個基金嘅信託人，已聯絡一批律師準備替學生辯護，中大學生被捕，應該可以向612基金申請援助嘅。」
香港真係幾多有心人，醫生K補多一句：「我都有捐錢畀食物援助，例如麥當勞禮券，但據講又係冇乜人去攞。我哋係應該幫吓手嘅，坦白講，林鄭月娥在6月9日一百萬人上街和平遊行之後，完全唔理，仲要心急到即晚宣佈要在6月12日在立法會通過二讀，數夠票吖嘛。如果唔係班年輕人衝擊立法會，送中條例已經通過咗，林鄭不理和平示威市民，但向激進行為讓步，令人氣憤，But she got what she deserved，之後嘅示威咪愈嚟愈激囉！林鄭就係暴力衝突始作俑者。但話得說回來，我哋班老嘢都係和理非人士，認為年輕人再不停止衝擊警察，只會犧牲自己或令市民不耐煩。你有冇辦法同佢哋溝通？勸佢哋睇吓馮睎乾篇勇武派還可以做什麼啦。」邊度有吖！一早講咗Be Water，流向無形，好難控制。拜拜之後，忽有所悟，上網搵番今年立春日，本欄講過乜，唉，查番今年2月4日立春適逢壬申日，係破日，諸事不宜，當日本欄講立春日水多，己土無力防水，提防今年有水災，原來雖有颱風大雨，水災竟然就是Be Water！如何善後，林鄭冥頑不靈，不如搵葉漢良算一算。