尹子維入行接近二十年，44歲嘅佢感情生活夠晒精采，經常換畫，終於以為搵到個啱心水嘅，點知最後都係分手收場。噚日凌晨，尹子維個29歲「中國第一美胸」未婚妻徐冬冬，喺微博貼出合照宣佈：「我們分開了，但他還是我最好的朋友，一切順利。」尹子維朝早轉貼文，回應：「可能現在做朋友最好，永遠支持你。」由「婚」變「分」，唔少網民都戥佢哋覺得可惜。
話說上年尹子維同徐冬冬合作拍電影《合約男女》，戲中有唔少親熱戲，就係咁咀嘴吓撻着咗，11月時徐冬冬喺微博自爆戀愛ing，勁讚男友內心美好，今年1月戀情正式曝光，但3月就被人影到當街鬧交，44歲尹子維仲黑面發脾氣，女友喺街頭喊晒，不過4月佢又宣佈向女友求婚成功。
月初齊睇騷
今個月1號，恭碩良喺旺角開騷，尹子維孖未婚妻拍住拖去捧場，以為打風都打唔甩，勢估唔到兩個星期唔夠，戀情就玩完。
撰文：馮仁昭