穆罕默德沙拿唔止喺球場上跑得快射得快，喺球場外呵番球迷一樣咁快。上星期六利物浦大軍喺美活訓練基地集訓，如常喺場外吸引唔少紅軍球迷等候，希望等到球員離開嗰陣可以同佢哋合照。其中一位11歲小利迷，因為太心急去追星，唔小心撞咗落條燈柱度，當堂「爆缸」流晒血，攤喺地下幾乎冇知覺。當時揸緊車諗住走嘅沙拿，即刻返轉頭睇吓小朋友咩情況，最後仲同佢合照，呢張相真係有血有淚，但個小朋友一定會感受到無比溫暖。
11歲嘅路易士科拿，同埋細佢一歲嘅細佬艾錫當日喺集訓基地門外希望等到偶像沙拿。當佢哋見到沙拿揸住佢架賓利走人嗰陣，路易士就跟住追上去，希望至少可以吸引到沙拿同佢揮吓手，點知掛住追冇留意路面情況，大力撞咗埋燈柱度，幾乎不省人事。沙拿見狀二話不說就掉頭返去出事地點，睇吓路易士咩情況。雖然撞到個鼻一直流血，好在路易士都冇大礙，沙拿返嚟向佢慰問同抱吓佢，最後再同佢兩兄弟輪流合照。路易士嘅繼父事後將合照放上社交網，仲大讚沙拿係真暖男，不枉路易士咁鍾意佢。
艾利臣拉傷有排唞
紅軍喺今季英超有好開始，上星期五喺主場以4:1大破諾域治先拔頭籌，不過對主力門將艾利臣比加嚟講就唔多好，喺上半場尾段開龍門球嘅時候拉傷小腿肌肉，雖然仲要等詳細報告先可確定艾利臣要休戰幾耐，但一般相信至少都要唞1至2個月，總之星期三喺伊斯坦堡對車路士嘅歐超盃，同星期六下輪英超對修咸頓就肯定唔使預佢，到時紅軍會起用啱啱簽咗冇耐嘅前韋斯咸門將阿祖安卡斯迪路。
VVD對阿祖安有信心
雖然阿祖安近季喺韋斯咸冇乜上陣機會，但紅軍後防大將華基爾雲迪積克（VVD）就對佢好有信心：「艾利臣無疑係我哋陣中極重要嘅成員，但呢樣（受傷）係每隊都有機會面對嘅情況。阿祖安有能力喺呢個時候挺身而出，亦相信佢會做得好好，佢喺英超都已經歷過好多嘢，佢喺上場入替之後失波純粹係冇運。」
