52歲的黃澤鋒成為新手爸爸最新一員，剛滿月的愛女小黃妃（乳名）出生時，黃澤鋒形容為「生死一瞬間」，畢竟太太是52歲的高齡產婦，入院分娩時身體出現妊娠毒血狀況，要立即全身麻醉生產，再送入ICU觀察。
黃澤鋒說，人生最大希望一直想有自己的兒女，在醫院等待的時候，有如天堂與地獄，「姑娘第一件事就同我講，你望右手邊好喇，你唔好望左手邊！左手邊係搶救緊（老婆），右手邊就係我個女。」
天堂與地獄的感覺，他很熟悉。2004年經歷首段婚姻和生意失敗，他由2,000呎豪宅搬去400呎屋仔，要還清欠債重新洗牌。
每次開心過後又要迎接逆境，「我都有咁諗㗎，係咪有咗小朋友就會唔好，我會咁諗，陰影嚟嘅。」念頭一轉，冇得諗咁多，現在教拳教游水的黃澤鋒，只望可以孭起頭家做到老。
真漢子也！
撰文：文嘉龍
攝影：沈健程
80歲都仲教緊游水
經歷過天堂與地獄滋味，有時難免總往壞處想。生BB本是開心事，太太卻出現妊娠毒血，令黃澤鋒在醫院期間壓力爆煲。「開刀嘅時候就有妊娠毒血，醫生話最大嘅問題係佢（太太）會有機會中風，咁就大件事喇！最慘係我自己喺出面等，度日如年唔知點算好，成日諗係咪我累咗佢？唔生咪好囉！」
身為佛教徒的黃澤鋒在醫院念齊所有經文，「覺得係天堂與地獄呀，呢邊就係小朋友，呢邊就係老婆，我第一次去摸我個女嘅時候，佢仲喺氧氣廂入面，因為個肺仲有少少積水；呢邊就係我太太，我返到去病房嘅時候，我喊到阿媽都唔認得，出面仲有我啲親戚，佢哋走咗，我喊到呢，如果唔係咁（喊出嚟）我諗我會爆煲。雖然我都五十幾歲，喊就喊啦，但我唔可以俾人睇到，絕對不可以，因為我係男人，如果我有半點倒下，呢頭家就出事。好好彩真係托賴，之後太太血壓就降喇，小朋友過咗一日之後，醫生話佢冇感染冇肺炎，所有嘢都冇事。我第一次抱住個女，我好感觸！」
2010年與圈外太太陳麗麗結婚，今年才生下女兒，黃澤鋒說，為了孭起頭家要永不言休，「我都同太太講，唔緊要我辛苦啲，我冇諗過退休㗎！我一定係做到老，有工就做，養到佢大，最多人哋有嘅退休生活，可能我享受咗呢，𠵱家到我要養咪養囉，小朋友最少（養）21年啦，我今年52喇，係咪最少都72歲吖，如果廿四、五歲畢業，唔係好過份吖，我都77、78歲。我都托賴，我做教練，有啲教練80歲都仲教緊游水，咁我咪教囉，我唔介意喎！」
賺錢養家要做到老，黃澤鋒現在的教練生涯也的確有排忙。「教拳、教水、拍嘢，有時會教訓練班，基本上一個禮拜都好忙。」還有他為興趣而當的泰拳拳證工作，「拳證其實同拳手冇分別，佢（拳手）去到邊你要追到邊，係咪要體能呀，短速仲要快喎，我哋要走得，所以我鍾意呢樣嘢。」
靠做教練的收入，黃澤鋒說足夠令他養妻活兒就可以了，最重要是那份滿足感，「譬如教游水教拳，教游水令到個小朋友識游水啦，教佢去比賽，當佢攞到金牌嘅時候，嗰種歡喜同埋滿足，好似係我創造出嚟；教拳又係一樣，見佢身體越嚟越好，去打比賽，贏輸唔係一個問題，係滿足感大好多，由唔識教到佢識。」
咁多年做過一套男主角
黃澤鋒是1987年無綫藝訓班畢業的，在無綫多年來做盡配角，唯一嘗過主角滋味是87年的《鐳射青春》。「咁多年我做過一套係男主角啦，《鐳射青春》（鄭伊健、蘇永康合演），仲有一套，90年代仲有一套做過第二男主角，叫做《奇幻人間世》，男主角吳岱融，我做第二男主角，跟住就去到2000年，《勇往直前》做幾好嘅配角啦！唔緊要嘅，當然有人做主角有人做配角，配角都好重要，主角好都要配角做得好，你轉過第二個方向去諗囉，其實要做好一個配角都難㗎，你睇吓Benz雄（許紹雄）！」
無綫人工眾所周知出名奀，黃澤鋒說是「餓你唔親，但一定唔會令你特別富有」，他說自己在無綫年代好彩常有爆騷機會，到了2012年過檔王維基的港視，也是為錢跳槽。「當時王維基個薪酬係畀得多好多，好坦白講我喺TVB嗰個年代係爆騷，我又唔需要受氣，因為真係old seafood，老屎忽即係老海鮮，基本上冇乜人會畀氣我受，無論梳化服所有工作人員都係好尊重我黃澤鋒，你二十幾年早人入行，人哋PA都做咗監製喇，人哋點會蝦你呢，你都老人家！」
向外闖除為錢，也望求一個突破，「我都學咗二十五年藝，係咪都應該往外闖一次呢？我從來冇跳過槽㗎，其實以前幾次ATV亞視嘅跳槽行動，我諗都唔會諗，但係我做咗二十幾年，如果我唔行，可能我唔會再行，譬如我唔走，今年已經係我喺TVB做咗32年喇，我會唔會走呀？唔會啦，我係咪呢32年就係咁過呢？出去可能會死，但當時我結咗婚，太太又冇乜負荷有份工，我決定可以走一次。如果我留喺TVB，同一個人工，佢可能會加，我唔知，冇人知道明天會係點！」
在無綫做配角的日子，黃澤鋒都有經營副業當老闆，當年與邵傳勇、駱達華和幾位圈外股東合資，在尖沙嘴開火鍋店「麻辣小喇叭」，之後邵和駱二人退股，黃澤鋒與其他股東繼續經營，不過卻因為03年沙士一役，最後結業收場。
「99年係我第一段婚姻（首任圈外妻子Winnie），2000年我拍完《勇往直前》，做咗十幾年，我係咪都要諗我嘅出路呢？結果就諗最簡單嘅嘢，做火鍋啦，又唔使廚房，收錢咋嘛，原來係錯嘅，火鍋係需要廚房，邊個做刀工呀？邊個煮嘢呀？煲湯唔使煮呀？咁就去做，我負責做買手去買貨，由唔識做到熟晒，啲行家要問，鋒哥，你有乜嘢意見？」
人衰行路打倒褪
最終執笠收場還要欠債，天堂與地獄的感覺，又來了。「當時都勁㗎，好多藝人都有落嚟幫襯，幾大嘅明星包括係梅艷芳都冇房坐，都係坐廳！到咗沙士輸到一乾二淨，完全係倒輸，2002年同2003年係天堂同地獄，02年係天堂賺緊大錢，03年係一個地獄，你有冇見過尖沙嘴冇人吖？一個人都冇，仲要閒日正午呢個時候出緊太陽嘅時候落雹，阿黃生呀，落緊冰呀，我出去睇吓，落緊雹，手指咁大粒，係咪好兆頭呀？梗係唔好啦！」
04年一鋪清袋，多年積蓄一夜間蒸發，他獨個兒搬到深井400呎屋慳住使，「嗰時三十幾歲，生意失敗之後，我連婚姻都冇埋，由住二千呎嘅屋變住四百呎嘅屋，我搬去四百呎嘅屋，所有嘢都掉晒，先至可以搬入去一間四百呎嘅屋。由清水灣搬去深井，當時深井好平租，𠵱家就好貴，當時唔值錢，05年嘅時候，全海景都係幾千蚊租，仲要我一年之後，業主問我買唔買，我話，吓，呢個時候買，唔係吓話？佢話好平，百零萬我賣畀你，我真係蠢呀，如果嗰時買，𠵱家發咗達，哈哈哈，但係我嗰時真係冇錢，還清咗債之後冇晒錢。」
黃澤鋒說，當時為了慳錢，一包超市排骨可以食足一個月，他更說，行起衰運乜都有可能發生。「住深井嘅時候，俗語有云人衰行路打倒褪，諗住最平做運動嘅方式就係跑步，着番對鞋走落去跑，行到去地盤俾個釘插穿對腳流血，有冇人衰到咁樣？我同自己講，乜你衰到咁貼地嘅黃澤鋒，條氣唔順，返上去止咗血之後落去再跑，我個人個性格就係咁，再嚟過囉，由深井跑去屯門再跑返轉頭，其實唔係好遠箒，OK嘅，又可以keep住做到運動，又唔使錢。以前打高爾夫球變咗跑步，天同地啦，打一場高爾夫球幾多錢？跑一次步一蚊都唔使！仲要嗰年我返咗去TVB，嗰一年我係唔夠騷，我大半年都係冇人工出，好窮，又要還錢，咪諗盡辦法再做多份工。」
為了盡快還債，做多份酒吧工作，日日天光六點先收工。「盡快搵晒啲錢返嚟。酒吧呢個行業唔係一般人做㗎，賺到錢都好，你都要睇番醫生，我係每一日都醉，六點鐘的士喺門口等我，車我返去深井，嗰時都未有Uber未有App，的士司機話得喇黃生，唔會揸太快，因為太快我冇命。」
賠了事業和婚姻，只能共富貴不能共患難？「女人同男人唔同呀，女人死心嘅時候，你唔使旨意，係冇得返轉頭！共唔到患難？又唔可以咁講嘅，有難係應該要走開嘅，無謂攬住死啦，我死好過你死啦！冇所謂嘅，一個男人我頂得順，結果婚姻冇咗啦、事業冇咗啦，所有嘢重頭嚟過。當時真係會好灰，我又冇怨過個天，我只係話點解我條命永遠都係咁？好似今朝我同我太太講，我預咗捱得辛苦啲，但係我可以睇住佢（囡囡）大幾咁開心。」
現在家住屯門居屋的黃澤鋒，即使要捱，都捱得開心。
【後記】三十六着 走為上着
黃澤鋒是前港隊成員，又有「渡海泳飛魚」之稱，愛游水亦愛泰拳，他住在深井的時候更加是日子有功。「我搬咗去深井，揀一樣嘢係我鍾意嘅，就係泰拳。一條泰拳褲可以打兩年，一個手套可以打四年，我仲記得我第一個手套係二百五十蚊，一條褲幾廿蚊啫，日日打，就係咁練番嚟，個心冇任何雜念，一個星期練足七日武，我嗰時喺TVB拍緊戲，除咗開工冇間斷，我喺大聖劈掛呢度係攞勤工獎㗎！」
現今呢個時勢，記者提議他應該開班教埋自衞術，訪問完之後要入元朗同學生食飯的黃澤鋒說，要打，他未驚過，但他只會教人，不會打人，「學武仲有一樣係教人乜呀？三十六着，走為上着呀！」
呢位黃Sir，好受學生歡迎嘅！
場地提供：冼林沃技擊會