逆權運動遍地開花，已為兩子之父的E-Kids成員阮民安（Tommy）日前帶着妻兒到連儂牆貼memo，教囝囝讀「真普選」、「香港加油」，即使他們現在不明白，也希望他們可以先入腦。身為MK-Pop始祖的Tommy上周六在旺角義載學生被激讚，他坦言，若果今天不爭取，小朋友以後就沒有希望，更指他站出來來其實沒有任何動機：「純粹睇唔過眼，人性、良知好緊要。」
現年39歲的E-Kids成員阮民安，上周六在旺角目睹警民衝突，離開時更義載兩名學生離開旺角，獲連登仔激讚。Tommy周一再到旺角出席8.5三罷集會，力撐反送中的他越行越前。已為兩子之父的Tommy，日前帶着老婆Eva、兩歲多的長子治童與四個多月大的幼子宥童，在馬鞍山接受《蘋果》專訪，走過曾發生激烈警民衝突的馬鞍山分區警署，再到大水坑站的連儂牆貼memo。
教囝囝「真普選」
Tommy教囝囝認連儂牆上的字，治童跟着爸爸讀出「香港加油」、「真普選」和「Be water」等詞語：「佢都差唔多3歲，呢個年紀特別好記性，嚟連儂牆就最啱，呢度特別多正氣字眼。不過都有啲『黑警』同到林鄭個樣喺度，嗰啲我就冇教，費事嚇親佢。」Tommy希望治童長大後會明白這段香港的歷史：「希望佢明白哥哥姐姐幫佢未來做咗好多嘢，佢一定要知真相。」他又表示教囝囝讀「我要真普選」，雖然不明白當中意思，但希望可以「入咗腦先」。Tommy希望囝囝對香港有歸屬感：「佢大個都十幾年後，唔知香港到時變成點，治童喺香港出世，要對呢個地方有感情。」
連登仔近日非常欣賞Tommy，他直言：「我都估唔到，老實講站出來我冇任何動機，純粹睇唔過眼，人性、良知好緊要，連登仔有講番2014年時我有支持過學生，其實慢慢做大家會見到，呢次我冇去諗抽水或攞光環。」提到連登仔說錯怪了Tommy，他笑言：「如果以前有嘢做得衰係要笑吓嘅，做得啱咪讚吓我，我只想繼續做一分子畀力量年輕人。」
心痛被叫小強
曾在旺角接觸年輕抗爭者的Tommy，心痛他們要吃催淚彈，也肉赤他們被叫「曱甴」、「小強」，畢竟Tommy都曾被揶揄過叫「樂壇小強」：「當時我俾人咁叫都唔開心，不過我到𠵱家一直有另一個想法，你估你話我係『小強』，我就係咩？用唔係人嘅稱呼去形容人，眨低佢哋自我價值，你越話我係『小強』，抗爭者先要有打不死精神。」Tommy也不屑黑警行為：「7.21元朗無差別打人，令我覺得香港好危險，我屋企有兩個小朋友，我哋今日唔去爭取，可能一世都冇機會再去爭取，唔爭取我哋小朋友以後就冇希望。」Tommy表示人生已走了近一半，將來怎樣對他影響不大，只想囝囝將來知道曾有一班人無條件為香港付出，而自己的爸爸也曾出過少少綿力。
採訪：比華利
攝影：沈健程
