法國《費加羅》日報大篇幅報導逆權運動，訪問浸大教授高敬文，踢爆大陸武警混入香港警隊，勇猛同文馮君指出WhatsApp流傳的中譯出錯，不是「北京已秘密地為香港警隊加入了30000名增援」，而是「北京已在警隊中（共三萬人）秘密插入某數量的廣東省武警」，令我茅塞頓開。正在亞洲巡迴溝仔的「巴黎仙」前天也收到那段訊息，厚着臉皮與有榮焉之餘，仲好乖咁打開平板電腦做fact check，怎麼知道該報網站收費，只供會員無差別瀏覽，免費版登了訪問頭兩條問題，尚未進入正題便戛然而止，唯有悻悻然收手。唔知頭唔知尾的讀者可能問，既然一本正經做學問，點解唔攞出真金白銀訂閱，哈，《蘋果》就話瞓身支持啫，《費加羅》是右派喉舌呀，堂堂左膠畀錢佢賺成何體統？
就我所見，作為外國勢力，呢位高教授份人應該幾信得過，記者問「林鄭當初推行修訂條例，是因為幼稚抑或計算」，他老實不客氣答「因為盲」，就一語中的大快人心。內地警力真係陰啲陰的滲入香港部隊嘅話，不外四海之內皆兄弟，有錢出錢有力出力啫，張愛玲話齋，「有美的身體，以身體悅人；有美的思想，以思想悅人；其實也沒有多大分別」，上面出武警，下面出黑社會，誰說不是佳偶天成？這個傳說假如屬實，不但解釋了為什麼特首誓死不肯成立獨立調查委員會，也為數不盡的謎團提供了合理答案：難怪有個人生路不熟的警員慌失失狂奔，遭上司吆喝「停呀！做咩呀？」，也難怪O記警司唔准「叉頸警」開聲，雖然同樣操粵語，廣州口音好易認㗎！