【本報訊】已數不清，Joseph（化名）在訪問時嘆了多少次氣。他安靜地坐着，時而低頭沉思，時而玩弄手中紙張，被捕後兩周以來，每天都處於精神繃緊狀態，雖然偶爾面露笑容，但更多時候心不在焉。被捕時，他被警方按在地上，用腳踩着背面，到達警署時被語言侮辱、提供鹹水當食水，又遲遲未能聯絡律師。他是7.28警民衝突中被補的少年；一個身心佈滿傷痕的少年，被控暴動罪，或要面臨十年監禁，但他沒有放棄，呼籲同路人繼續作戰：「最可以支援到我哋嘅，就係市民嘅支持，唔好放棄呢場運動。」
拘捕時被故意磨損雙手
Joseph拉起衣服展示身上傷痕，通紅的傷口開始結痂，拘捕時造成的創傷就如烙印，沒法磨滅。他記得當時被警員壓在地上，雖然已被制服，但警員依然踩他背部，「我配合警方，將對手放喺後面畀佢哋上手銬，但佢依然好大力拉扯我雙手，將我雙手喺地面磨擦，磨到損晒」。他好不容易大叫一聲「唔好咁大力」，卻換來更多「速龍」包圍，失控地喝罵他：「做咩呀？小小力都頂唔到呀？」等候上警車期間，被捕人士被分成幾組，被不同警員指罵，「佢哋話『你好樣衰啊』、『你撈邊瓣』、『你好似好熟口面喎』，目的係想套我講多啲嘢，咁我當然冇理佢哋啦，唔會俾佢影響情緒」。
到了警署拘留所，又再有警員問他「出過去幾多次」、「一定唔係第一次喺前線啦」、「你似成日掟磚喎」，不斷以激將法引導Joseph答話，但當時他渾身痠痛，選擇冷靜應對，跟在場的警員形成強烈對比，「佢哋情緒好唔穩定，以為所有示威者都要殺佢哋咁」。
百多呎的拘留所，當晚收押了不少人，在那個炎熱夏夜，拘留所跟他的心情同樣地鬱悶，又焗又熱，大家坐着或躺着，眼望灰白的牆身和天花板，黏着對方的汗水，一起度過了無眠之夜。首數小時，他們要求喝水，一口呷下，竟然是鹹水，他們面面相覷，沒想過香港的執法人員竟是如此幼稚。
要求見律師 警扮聽唔到
有律師表示被捕者見律師刻不容緩，Joseph到達拘留時立即要求見律師，但警方一直沒理會，直至五、六小時後，他再問看守的警員，「佢問我點解唔早講，我一早就係同佢講，佢扮聽唔到，跟住又同我講，叫唔叫律師冇分別，反正份口供都係寫『冇嘢講』」。
拘捕時對被捕者進行身體暴力，拘留所內就視人權如無物，再加語言暴力，「我話要搵律師，警員就好凶咁講『唔好畀我再見到你，見到實做死你，你死梗㗎』。」直至多個小時候後，Joseph終於見到律師，錄完口供後，緊繃情緒稍為紓緩，才感到背部痛楚，律師掀起他的衣服，目瞪口呆，背部皮膚紅腫而且損傷嚴重，立即帶他驗傷，「我被拘留時有問警察背部係咪有傷，佢哋話冇」。
■記者梁嘉麗