因為暴動罪被判囚七年嘅盧建民（影攝食），早前曾透露患癌病嘅爸爸病況轉壞，要入ICU接受化療，佢當時好擔心爸爸病情，喺監入面忍唔住喊咗一場。最近佢再寄信畀《蘋果》副社長陳沛敏，透露佢爸爸原來已經喺7月29日不幸病逝，盧建民雖然好傷心，但講明唔會因為咁而放棄。
不滿政府亂告暴動罪
盧建民喺信入面話，佢朋友探訪時話佢知，佢患病爸爸喺7月29日不幸病逝，當時盧建民喺探訪室入面已傷心到不停流淚，但佢話傷心過後，唔會因為咁而諗了斷餘生，佢會面對餘下刑期，同麻木不仁政權算賬，又批評政府在連場抗爭行動中，冇足夠證據亂告人暴動罪，究竟香港幾時由法治變咗人治？