德國球壇轉會窗仲有差唔多一個月先結束，冇咗列貝利、洛賓同占士洛迪古斯嘅拜仁慕尼黑，雖然喺今夏已經收購盧卡斯靴南迪斯同班捷文柏華特兩位後防球員，但鋒線新兵就只得小將艾比，令射手羅拔利雲度夫斯基唔多滿意，話仲需要多三位新兵。列貝利同洛賓今夏離隊，占士洛迪古斯亦因為借用期滿返咗皇家馬德里，拜仁一下子冇咗三位中前場主力，但目前仲未見重點收購。早前簽入嘅盧卡斯靴南迪斯、班捷文柏華特同19歲新星艾比，都滿足唔到羅拔仔，佢話球隊仲要加強進攻力：「冇咗佢哋3個就要簽番3位新兵，但目前我哋都冇乜簽人，就算曼城嘅利萊辛尼加盟，都仲要翼鋒、6號位同進攻中場。如果成季淨係靠13、14個人踢，會好難踢囉。」