今夏由車路士轉投皇家馬德里嘅比利時球星夏薩特（右三），喺周三對薩爾斯堡嘅友賽度終於開齋！佢喺19分鐘接應賓施馬傳波，切入中路後一射破網，幫皇馬領先1:0。踢到39分鐘時佢再接應賓施馬傳送後單刀，不過一射就被薩爾斯堡門將擋出，未能增添紀錄。換邊後，薩爾斯堡有唔少攻勢，不過就威脅唔到皇馬門將泰拔高圖爾斯，皇馬亦有盧卡祖域喺84分鐘射門但被撲出，最終憑夏薩特嘅開齋波一箭定江山，以1:0小勝薩爾斯堡。至於喺皇馬之前5場熱身賽度只係踢過2場，分別喺對阿仙奴同馬德里體育會嘅比賽度後備上陣嘅加里夫巴利，賽前就冇被列入呢場友賽嘅大名單度，而有傳會被賣走嘅占士洛迪古斯同馬里安奴戴亞斯今場都同樣冇份踢。