自從當年涉嫌種族歧視曼聯名宿艾拉之後，蘇亞雷斯同曼聯可以話「有你冇我」。就算已經過咗差唔多八年，阿蘇都已經轉投巴塞隆拿，魔迷仍然唔肯原諒呢位烏拉圭國腳。
日前紅魔前中堅美爾喺MUTV節目度隨口一提，話自己話到事就一定會買阿蘇，都要被球迷鬧。英超轉會窗即將關閉，呢位紅魔99年三冠王成員最近上MUTV分享睇法，當講到蘇亞雷斯係唔係其中一個理想嘅引援選擇，佢就話好想，仲唔介意呢位已經年屆32歲嘅前鋒曾經效力過死敵利物浦。不過球迷就唔係咁諗啦，有人好嬲咁話：「呢個節目唔代表我哋曼迷！一班前曼聯球員居然話要買蘇亞雷斯呢個曾經侮辱同種族歧視球隊傳奇（艾拉）嘅人？」又有人指節目要就呢番言論道歉：「佢哋竟然建議將種族主義者帶嚟球隊，簡直要向全世界道歉！曼聯永遠都向種族主義同前Scouse（講利物浦口音英文嘅人）說不！」
其實就冇咩迹象指阿蘇今夏會返去英超嘅，更加唔好話去曼聯喇。喺轉會窗關閉前，紅魔鋒線目標竟然係今夏約滿熱刺嘅34歲中鋒洛蘭迪，最大吸引之處就當然係佢家陣係自由身，唔使轉會費就可以簽。