球王唔係聖人，一樣有七情六慾。早前去伊比薩島度假嘅美斯，就懷疑當時喺夜店飲多咗，喺酒精驅使下一於懶理平時嘅君子形象，趁住燈光夠暗，突然從後向老婆安東莉娜「施襲」，用力揸咗對方翹臀兩下。
美斯又一次失意於美洲國家盃後，就搵埋法比加斯同蘇亞雷斯兩位老友，帶埋老婆一齊出發去伊比薩島度假，早前仲爆出喺一個音樂會上，呢位球王同一位四眼仔發生衝突兼講埋手，要保安調停。
網民︰好彩係老婆
不過，美斯失態原來唔只呢件事，近日網上有片，呢位巴塞隆拿球星竟然喺大庭廣眾下調戲老婆。片段見到美斯喺間夜店同老婆疑似坐咗喺一張長凳上面，而美斯突然望實老婆，之後就出動佢嘅球王之手，先揸老婆左邊翹臀一下，然後再揸埋右邊，唔知係咪連球王都受耶穌嗰句「被人打完左邊面就要打埋右邊面」啟發，定係向前阿根廷球王馬勒當拿嘅「上帝之手」致敬呢？而且睇落個力度都幾大，蘇亞雷斯伉儷仲要企喺附近，但就好似冇發現美斯呢個鹹豬手舉動。網民都笑美斯有情難自禁一面，Twitter用戶Barzaboy就留言：「好彩係佢老婆，如果係其他女人就弊！」
巴塞美國2:1贏「玻」
另外，巴塞隆拿喺美國時間周三晚，同拿玻里約戰邁阿密，踢今夏最後一場熱身賽，而美斯因操練時拉傷小腿，冇隨隊一齊去美國，但有蘇亞雷斯、基沙文同法蘭基迪莊呢班球星撐場，陣容已經夠晒星光熠熠，而且阿蘇同基沙文今場首次正選搭檔，已經非常合拍，但兩個都冇波入。場波踢到38分鐘，反而由中場布斯基斯接應青年軍球員列基佩治嘅傳送射入，幫球隊打開缺口，只係完半場前三分鐘，拿玻里亦靠荷西卡利祖近射搞到烏姆迪迪擺烏龍，追平1:1返更衣室。
巴塞半場就換走基沙文同阿蘇，到下半場中段雙方先再作調動，但直到79分鐘先由拿傑迪錫幫巴塞射入奠勝波，以2:1勝出，喺下個禮拜西甲開鑼前，累積熱身賽三連勝。