呢輪出街要份外小心，因為所有嘢喺警方眼中都可以成為武器，浸大學生會會長就因為有雷射筆，被警方用涉嫌「藏有攻擊性武器」嘅罪名扣查咗差唔多兩日。
偏偏身為國企而且市值過萬億嘅中移動就冇有怕，噚日中期業績發佈會上，竟然向記者大派雷射筆，包裝說明仲寫住不可直視激光光束及將光束瞄準任何人眼睛，呢個豈不是一件武器？
「關鍵係睇用法」
有記者就喺會上追問高層，點解要派呢支筆，一聽到呢個問題，公司秘書大為緊張，拿拿臨出嚟搶答，話支筆上年已經訂咗，希望外界唔好過份解讀。不過秘書講咗成分鐘，都擋唔住好想答呢條問題嘅董事長楊杰，佢話雷射筆係咪攻擊性武器，關鍵係要睇用法，又話雷射筆本身係實用工具喎。八方覺得，呢個回應光明磊落，有晒「底氣」，秘書姐姐又使乜咁緊張吖。