北京落柯打要人大、政協同建制派全力撐警，好似民建聯過去力促特首林鄭月娥政府落實送中惡法，令香港近呢兩個月因為呢條惡法滿城風雨，再加上最近警察濫用武力鎮壓示威惹來全城鬧爆，民建聯噚日都照樣喺facebook出post，呼籲巿民參與明日（10日）由「守護香港大聯盟」搞嘅撐警日。個post呼籲大家當日身穿藍衫以示撐警，不過民記咁搞即刻俾網民恥笑同惡搞。
好似唔少網民恥笑呢個撐警活動宣傳海報設計奇差，有網民話：「炒咗個designer先啦，張poster老土到一個點」，結果有網民就「略盡棉力」，立即幫手改圖，由「全民撐警日」變成「全民撐警收規」、即係收黑錢，唔知宣傳效果會唔會好啲？又有人留言話：「警察交辭職信，家人一生平安？」亦有網民話建制派如果真心為社會好，就唔好再搞埋呢啲撕裂社會嘅活動，更質疑民建聯呼籲市民前往現時圍咗水馬嘅警署表心意，係咪想煽動市民8.10圍警署？
工聯會反罷工遭恥笑
除咗民記俾人惡搞同恥笑，工聯會同樣喺facebook出post，係咁鬧示威者唔應該罷工同抗爭、又話示威者搞暴動，影響市民生計，但即時畀網民留言寸佢哋，話「工聯會討論暴動暴力特別有說服力」、「強烈譴責工聯會六七暴動破壞香港法治，燒死林彬血迹斑斑，殺人放火金腰帶！要求褫奪六七暴動領袖楊光大紫荊勳章！」、「六七暴動你道歉咗未啊？」真係面就人畀，架就自己丟！
李八方