現年65歲邵氏武打影星羅莽，其妻於89年因血癌逝世，之後他一直未有再婚，多年前終覓得第二春，跟細自己20年的內地女子拍拖，至今已愛情長跑8年。羅師傅讚女友聽教聽話，又遷就他，所以與女友沒有文化及年齡差異，相處愉快，而女友則愛他愛國愛港，兩人好啱key，更謂不排除隨時結婚，但兒孫滿堂的他，則表示不會再生子女。
買樓認識
羅師傅昨日接受《蘋果》電話訪問時，大方認戀情：「拍咗8年，好耐啦，我哋相識係緣份，我去買樓，佢係做地產，大家識到，相處覺得情投意合，一直做朋友，做到𠵱家。」問到女友是否香港人？羅師傅說：「佢係內地四川內江人，佢有時同我住埋一齊，有時返內地，見面時間好多。」
兩人年齡相距大，羅師傅指女友不介意：「最緊要男人有事業心，又要愛國又要愛港，咁佢就鍾意，佢了解師傅個性，有責任、有承擔力。」問到鍾意女友甚麼？他一副大男人口吻說：「鍾意佢聽我管教，譬如佢喺香港，點樣同人和平共處，呢個係大方向，佢要學吓喺香港點生活同人交流，佢冇問題。」
羅師傅透露女友識投資炒股：「佢一直炒股票，以前係職業，𠵱家係業餘，當然羅師傅投資畀佢，我畀資金佢打游擊咁囉。」問到給女友多少資金投資？他只說：「最緊要做人要滿足，知足常樂。」問到是否相信女友不是貪錢女仔？他肯定說：「梗唔會，佢知道羅師傅嘅教誨，點樣喺香港生活。」
不再添丁
兩人愛情長跑8年，感情穩定，羅師傅表示不排除會隨時結婚：「都有呢個可能，緣份嘅嘢要相處去某個位，大家覺得有冇需要，我嗰方面冇問題，大家都覺得唔需要排場，佢都唔係咁需要，我年紀大過佢，成日教導佢，喺香港點樣處事、應對問題。」有冇計劃生小朋友？他說：「我自己都有子女、四個孫，我都好滿意，我女婿喺懲教署做高官，雖然我可以再添子女，但冇乜必要。」
採訪：皓騫