郭晉安與無綫結束經理人合約、回復自由身，最近在電影《小Q》中與楊采妮飾演導盲犬寄養家庭的夫婦，湊巧兩人現實中亦是愛狗家庭，同樣對下一代灌輸不棄養寵物的宗旨。
楊采妮有一對兩歲大的孖仔，她笑言因為自己是獨生女，所以很羨慕孖仔有伴成長，而囝囝更有一個好家姐，她說：「我兩隻狗女3歲，係孖仔嘅家姐，BB同狗狗隔住個欄，我以前同狗狗講，等BB大個就可以同你哋玩，佢哋係好好保鑣，BB喊就通知我，𠵱家小朋友大咗就一齊玩，但係會叫兩個仔唔好咁大力扯狗狗，要就住佢哋。」
「唔好貪得意」
談到戲中演寄養家庭角色，楊采妮說：「好佩服寄養家庭，完成導盲犬工作之後，通常係寄養家庭收養，我覺得佢哋好偉大，照顧埋狗狗最後一程。我哋有同寄養家庭傾偈，佢哋真係好有愛心，我問佢哋係咪每次都好難受，佢哋話係好難受，但又覺得好開心。」
同樣有一仔一女的安仔，在兩、三年前經歷過家中小狗離世，他說：「嗰陣佢哋放學返嚟，話畀佢哋聽走咗喇，見唔到最後一面，被人清走咗，佢哋即刻一齊喊，仲喊得好淒涼，之後我哋祈禱，一祈禱就喊，畀佢哋抒發吓。我忍住淚，𠵱家唔再養，將來養唔養等佢哋自己決定，佢哋見證咗我哋養寵物係養到佢死嗰日，唔好貪得意。」安仔發現原來做導盲犬寄養家庭有守則，不可令狗狗心情太興奮，他說：「我做咗寄養家庭，朋友出埠會幫手照顧佢哋啲狗狗，等小朋友可以經常面對。」
撰文：張明
攝影：陳俊強