浸會大學學生會會長方仲賢前晚在深水埗買觀星筆後，被便衣警員截查，以涉嫌藏有攻擊性武器拘捕，事件令社會震驚，多位藝人也紛紛在社交網怒斥警方執法不當。
何韻詩爆Seed怒轟警方：
「聽日就全民一齊一人買一支雷射筆，睇你捉得幾多個。」阿詩指屋企有五隻貓，揚言會買夠五支：「貓與laser是好朋友這是常識，我𠵱家屋企就有一支，犯法啊拉我啊笨。」阿詩還連環出post寸警方：「其實鑊鏟、煎pan都可以成為攻擊性武器㗎，不如禁埋全港九新界師奶去街市買嘢啦。」最後還hashtag斥警察「目中無法」。
王喜：
「如果呢款觀星筆係攻擊性武器，咁你應該拉晒販賣攻擊性武器嘅舖頭先啱喎，係咪？」他又指出：「賣藤條嗰啲舖頭同買入持有藤條嗰啲人又使唔使拉呢？」
空手道黑帶的歐錦棠：
「建議所有空手道黑帶全部自首。黑帶係人間凶器。」他又寸爆克警濫權，表示：「師傅，為咗我嘅幸福着想，我求你搣我柴啦。」
林日曦：
「𡃁仔買電筒要拉，𡃁妹喺街收拾垃圾要拉，見男嘅就叉頸，見女嘅就搞到人走光，亂開槍，亂棍毆，有cam影住都咁，冇cam影住時不堪設想。」
黎瑞恩指買激光筆的用途大家心知：
「為確證雷射筆安全可靠，試吓射完佢（方仲賢）雙眼，通過安全標準嘅話，要求警方要立即放人兼道歉！」有人指小恩子盲撐，她說：「咁都盲撐？如果證實安全，我要求警方道歉喎！」
