【本報訊】浸大學生會會長方仲賢前晚於深水埗購買觀星筆被捕，其間遭警員叉頸制服，導致哮喘病發，現正於明愛醫院留院。方母昨晚從外地返港即趕往醫院探望，她哭訴兒子事後飽受驚嚇，情緒難以平復，對於兒子購買觀星筆遭拘捕，方母控訴警方濫捕及使用過份武力，並哭問「你哋（警察）都有仔女，如果佢哋俾人咁對待會點？點解要咁暴力？」
20歲的方仲賢被捕後，昨晚仍留醫明愛醫院，其母昨從外地趕到醫院了解，與兒子見面後接受《蘋果》訪問，談起兒子狀況，方母聲淚俱下：「我只係冇見佢一日，點解無啦啦會多咗條罪？我係單親媽媽，得佢一個親人咋，冇咗個仔真係唔知點算。」方母指，仲賢從小患有哮喘，遭警員叉頸制服後哮喘病發，加上其間遭警員出言恐嚇，令他飽受驚嚇，至昨晚情緒仍未平復，表現驚恐全身發抖，其後更發燒，致無法進食，令方母心如刀割。
信心盡失 「邊個保護細路仔」
方母指，兒子被捕時自己身在外地，上網觀看新聞片段始得知消息，「我見到佢俾人叉頸，佢做咗啲咩？點解未定罪就可以用暴力？」與兒子相處廿載，於方母眼中，仲賢性格純良，加上體格偏瘦，因此絕不相信兒子犯罪，亦難以理解何以需動用四、五名警員合力制服兒子，「體罰都唔會咁做，你係差人，受過訓練㗎！」對於兒子遭暴力對待，方母大感憤怒，認為警察濫捕已導致人心惶惶，擔心日後購買雞蛋及燒烤叉等，亦會被定性為藏有攻擊性武器。
訪問期間，方母多次哽咽質問警方，「你哋（警察）都有屋企人，有仔女，如果佢哋買支叉俾人咁對待會點？你哋自己諗吓！」方母指，警方制服兒子期間，曾喝令他「唔好搞咁多嘢」。方母質疑「佢搞咗乜嘢？係咪莫須有？」對於警方無理拘捕，方母直言已對警方失去信心，「點樣保護市民？邊個保護細路仔？」她促請警方盡快交代事件，還兒子清白。
■記者姜偉康