法國中堅哥斯尼星期二終於同阿仙奴解決咗離隊紛爭，順利返法國投效波爾多，但原來件事仲有餘波，喺波爾多官網宣傳呢位33歲中堅嘅加盟片入面，哥斯尼竟喺鏡頭前除咗兵工廠波衫，露出裏面嘅波爾多波衫（圖），咁做令廠迷嬲爆，鬧佢唔尊重。
哥斯尼為咗離隊，曾拒絕隨隊踢季前熱身賽，已經引嚟唔少廠迷甚至名宿炮轟佢冇職業道德，雖然佢最後如願喺轉會窗完結前離隊，但佢呢段幫波爾多拍嘅加盟片，似再向兵工廠插多刀。
唔少廠迷形容哥斯尼嘅行為係「恥辱」，「非常唔尊重，你唔應該咁樣對待阿仙奴嘅波衫」、「咁係我見過最難受人尊重嘅前隊長」等留言喺網上紛紛湧現。至於早前已勁睇唔過眼哥斯尼鬧離隊嘅前兵工廠射手伊恩胡禮，都再喺twitter發言：「好痛心，竟然咁唔尊重，你應該覺得羞恥！已經得到想要嘅嘢，但仲想挖苦人，你咁做會有報應！」