山水有相逢！前曼聯領隊摩連奴喺上季中好折墮咁俾紅魔炒魷，而且係再次眾叛親離嗰種，其中一條重要導火線，係同中場保羅普巴不和有好大關係。君子報仇十年未晚，有傳皇家馬德里見到施丹回歸後戰績冇起色，12月前仲係咁嘅話就會搵摩佬返嚟教，路邊社消息就話如果摩佬再登「艦」，就會堅決終止皇馬買普巴嘅行動，呢鋪真係終極復仇。
佩雷斯麻麻地普巴
普巴係摩佬教曼聯第一季嘅重點收購，以破當時轉會費世界紀錄嘅8,930萬鎊由祖雲達斯買佢返紅魔，點知效果同想像中差好遠，摩佬一直擺普巴喺4-2-3-1陣式入面嘅兩個防中位度，要求普巴長期積極防守，結果打唔出重心嘅效果，而且有指上年一月阿歷斯山齊士去咗曼聯後，普巴冇埋最高人工嘅地位，都有啲不滿咁。去到上季，普巴直情幾次被摩佬中途換走，寧願用小將麥湯米尼打正選，而且普巴一次仲喺後備席坐到放軟晒個身，冇晒心機咁，都係摩佬失民心嘅例證。
雖然摩佬最後季中被炒，到家陣都未有嘢撈，但有傳都可以影響到普巴，事關皇馬主帥施丹一直好想簽呢位26歲法國同鄉，普巴今夏都講過「係時候去搵新挑戰」，但一來曼聯喺未搵到代替人選之下叫價非常高，二來皇馬今夏已經用咗接近三億鎊，買咗夏薩特、盧卡祖域同洛迪高高斯等五位球員，資金自然唔多夠，三來會長佩雷斯似乎對呢單交易唔太熱衷，所以一直得個吹字。
最遲12月會炒施丹
不過以前帶領皇馬直落贏三屆歐聯嘅施丹，喺三月回歸執教後，皇馬戰績冇起色，上季最後12場無關痛癢嘅西甲得6勝2和4負，嚟到今季季前賽，四場竟然未贏過，只得1和3負，仲試過俾同市宿敵馬體會炒7:3，上半場竟然係輸0:5，雖然係熱身賽，但情況都咪話唔大鑊，所以就話如果情況持續係咁，最遲12月就會向施丹開刀，然後搵摩佬返嚟。
當摩佬返嚟，普巴要去皇馬嘅夢想自然就幻滅。當然啦，故事講到似層層，不過實際上都要睇施丹有冇料自救，睇吓佢以前贏三屆歐聯係真材實料，定係靠基斯坦奴朗拿度同莫迪歷成班黃金年齡嘅球星帶住啦！