周柏豪及泰臣在首集電腦動畫電影《憤怒鳥大電影》（The Angry Birds Movie）中聲演阿爆及阿查，演阿爆的柏豪自言現實中亦很爆，觸碰到底線就會變成一個炸彈。而演卡通人物的好處，柏豪大受家中的小朋友歡迎，更被要求全餐飯都要用卡通聲交談。
撰文：張俊銘
攝影：陳俊強
周柏豪及泰臣事隔三年再度合作聲演，為動畫《憤怒鳥大電影2》配音。早前二人在荔枝角受訪，柏豪賣花讚花香，讚第二集比上集好看：「但比上一集更加難配，初時覺得自己有經驗，以為用番嗰把聲就搞掂，個人好放鬆，一放鬆就把持不住忍唔到笑，忍唔到笑狂NG。」
老師教調聲音
柏豪指配音時幸好有導演、配音導師在場引導，他說：「有時自己錄音唔係好清楚自己把聲，我以為自己高音咗，但原來可以再高音啲，或者以為自己好嬲，原來有個方法聽出嚟可以更加嬲，老師會教，幫助到自己配音或演戲都有好大得着。」談到片中雀仔阿爆一角，柏豪笑言性格很似自己：「睇落冇乜嘢，但觸碰到底線或者嚇驚我，我就會變成一個炸彈，炸爛晒所有嘢。」
三年前為首集配音後，柏豪指家中小朋友非常喜歡其角色，他說：「小朋友叫我不如用阿爆把聲同佢哋食飯，全程用阿爆嘅聲同佢哋食飯都幾得意，同屋企小朋友多咗話題。」柏豪表示慶幸曾為日本動畫大師宮崎駿的動畫《風起了》配音，他說：「細個好喜歡睇宮崎駿動畫，教曉我好多嘢，愛與家庭等，細個認識嘅事都喺佢動畫中學到。」
拉鬆肌肉錄音
泰臣聲演小鳥阿查，他形容為尖啄啄流線型，眼神古怪、多嘴，行動快速，說話古怪，泰臣說：「大家話我同黃色嘅阿查好似樣，聽番自己聲音，講嘢好荒誕，自己都忍唔住笑咗出嚟，隻雀黃色好多表情，主要負責極端搞鬼嘅嘢。」泰臣指小朋友都有玩過Angry Birds遊戲，令他有很多共同話題。泰臣說：「配音學到如何運用自己聲音，我試過配八爪魚，無脊椎動物，感覺到自己塊面冇脊椎，所以講嘢冇力。入到錄音室要畀時間我熱身，先拉鬆肌肉，如果唔係，無情力會令自己受傷。」