前排國務院港澳辦高調開記招話要講香港局勢，唔少人都翹首以待，點知變咗與民同樂畀連登仔玩Bingo。噚日唔開記招，轉搞吹風會，笑料一樣多，有線記者無啦啦被轉工去TVB，連美國眾議院院長佩洛西都被改名，認真冇得頂。
成個吹風會，你話冇劇本，大家信唔信？但係有劇本又點，唔畀爆肚㗎？好似提問環節一開始，大家踴躍舉手，唔知係咪上次記招畀得太少香港傳媒提問，今次專登畀多啲之餘，第一條就畀香港傳媒問，仲要係有線嘅行家被點中。記者提問前會報上名來，提問完會先由即場傳譯繙譯，有線行家問完，耳筒就傳來繙譯話條問題係TVB記者問嘅。TVB係無綫、有線係Cable，咁都可以撈亂？
佩洛西改名「洛佩西」
而有記者問到有乜證據證明反修例運動有外國勢力嘅時候，國務院港澳辦新聞發言人楊光一輪嘴咁數出，由3月到7月美國發表過《2019美國——香港政策法報告》，美國副總統、國務卿見過「反對派的頭面人物」、點名提及壹傳媒創辦人黎智英後，又提到美國眾議院議長佩洛西形容過「香港發生的遊行示威是一道美麗的風景線」，但楊光稱呼對方做「洛佩西」，要旁邊同事提醒先識更正噃。