只係一條《逃犯條例》修例，特首林鄭月娥已經將香港成個反轉咁滯。「罷工」咗差不多成個月嘅林鄭，前日終於蒲頭見記者，但唔慌有好嘢講，市民叫佢下台，佢就話有責任繼續緊守崗位，繼續拒設獨立調查委員會徹查成單反修例風波，反而宣佈政府會搞跨部門記者會，乜呢個係市民訴求，以及有助解決困局咩？咁嘅特首，唔少市民想佢早唞，但唔係畀佢放假咁他條喎，所以噚日網傳林鄭今個星期六﹙10日﹚開始放大假時，唔少網民都好憤怒，覺得呢位特首仲好意思去逍遙快活？
局長繼續放暑假
宣稱林鄭放假嘅cap圖，標題係：「特首林鄭月娥『放大假』，將由周六起休假7天」，而內文仲話政府新聞處出咗新聞稿，八方當然去過新聞處網頁fact check，又唔見到有稿喎，所以問咗特首辦，此事當真？點知特首辦難得好快就回覆八方：「有關消息毫無根據，行政長官沒有計劃休假」；早前有傳林鄭因病辭職，特首辦都極速回應「完全不正確」。之不過網民心水都好清，唔少人留言諷刺冇方法擺平亂局嘅林鄭：「沒有休假，因為日日都罷緊工」、「日日喺禮賓府遊花園」；另有網民質疑：「除咗大陸，佢可以去邊？」
雖然林鄭唔放假，但佢啲𡃁就唔夠隊形，繼續放暑假。睇番前日個政府記招，完全唔齊腳，原來有幾位局長都去咗放假，例如教育局局長楊潤雄4號開始放到17號，遲下輪到食衞局長陳肇始由10號放到19號；至於勞福局長羅致光就由4號開始出差到7號晚先返香港。記招上羅致光派咗副局徐英偉撐林鄭，教局就完全冇人到場咯。
李八方