打比郡正式宣佈，33歲嘅前曼聯隊長、現效美職聯華盛頓聯隊嘅朗尼，將喺2020年1月正式加盟球隊，合約中有一年優先續約條款。除咗擔任球員外，朗尼亦會出任球隊助教，為佢未來嘅執教生涯做準備。
對於加盟打比郡，朗尼話好開心：「我對加盟打比郡好開心，我期待喺一月初加入高古嘅教練組同球隊，我相信自己可以作出貢獻。同時我要多謝華盛頓聯隊，我依然會盡力幫佢哋打入季後賽。」
朗尼上年由愛華頓轉投華盛頓聯隊，有傳佢太太高蓮思鄉同埋想小朋友喺英國讀書，不過朗尼唔肯同屋企人相隔異地，所以積極搵返英國落班嘅方法。星期二朗尼喺倫敦希斯路機場俾機組人員「野生捕獲」，亦笑晒口咁同大家影相，之後揸車去打比郡嘅訓練場確定最後細節，下年一月正式加盟，做球員落場之餘都會跟主帥高古學嘢，今年剩低嘅時間就繼續效力華盛頓聯隊。