容祖兒噚晚喺紅館舉行18場「Pretty Crazy Joey Yung Concert Tour 」演唱會首場，卻撞正全城三罷，英皇公佈演唱會如期舉行，如觀眾去唔到，可以保留連票尾嘅完整門票進行退票。祖兒遲咗一粒鐘約9點15分着住一件LED裙，企喺好似星球入面唱《空港》出場，之後換上緊身衫露長腿，好鬼性感，唱《逃》嗰陣，祖兒被男dancer抬起，祖兒除下披肩話：「歡迎到場嘅觀眾朋友，多謝你哋！」
有人叫回水
現場入座率有九成，歌迷等祖兒出場期間，大叫「光復香港」、「時代革命」，全場拍手，又有人喺座位舉黃色標語「反送中」，不過都有人因為等得太耐，大叫「回水」。去到睇騷嘅除有英皇老闆楊受成夫婦，仲有泳兒、蔡一智、蔡一傑、金燕玲同蘇絲黃、蔡卓妍同張敬軒有嚟捧場。
黃昏6點半時祖兒喺紅館出面拜神，問佢怕唔怕fans唔安全，佢話︰「歌迷、工作人員都好，最緊要安全。」問佢有冇考慮取消，英皇高層霍汶希即刻過嚟解圍︰「唔好意思，今日唔講住！總之按公司公告為準，我哋全日都開會，亦會一直留守紅館，留意突發情況，總之會審慎傾好至公佈，以免引起混亂。」
採訪：黃曉妍
攝影：陳俊強