苗僑偉（三哥）讀藝員訓練班入行，與劉德華識於微時，友情始於約40年前的「五虎將」，雖然五虎不常見面，但一碰面便有說不完的話題，遠至當年登台蝦碌事，近至現在家庭瑣碎事，無所不談，不過三哥坦言話題卻從不涉及工作和利益，這才可以把五虎友誼保存期無限延長。
現年61歲的苗僑偉80年代與劉德華、梁朝偉、湯鎮業和黃日華被無綫力捧，封為「五虎將」，多年後各有發展，但他們私下仍保持聯絡。近日三哥與劉德華在電影再合作，早前三哥為電影宣傳接受訪問，他表示跟華仔已十多年沒有合作，今次重聚兩人埋首即「話當年」：「我哋好多嘢講，由40年前開始講起，由廣播道五台山年代吹到𠵱家，主要講佢同我讀完訓練班，出嚟做跑龍套做茄喱啡時啲趣事，又會傾吓星光熠熠時候，表演玩雜耍，跳吓彈床好似好勁，當時我哋呢啲後生仔玩呢啲好得意，電視台出咗五個𡃁仔，俾人叫做五虎，其實五虎係傳媒畀嘅。」
兩虎多笑料
三哥與華仔兩虎碰頭最多的笑料，是他們一起到外地登台的日子，三哥回想：「以前都好多時候一齊去美國、東南亞等地方登台，我同佢去登台，唱歌時我會唱錯晒歌詞，都未到嗰個位我就唱咗去後面，搞到華仔無所適從。」兩年前華仔在泰國拍廣告墮馬受傷，朋友間大為緊張，他說：「佢未返嚟香港時睇到新聞已經好擔心，返到嚟第一時間去醫院睇佢。經過呢次意外，𠵱家唔叫佢都識得要保重，今次受過傷華仔係小心咗，唔單止佢自己，連其他演員做動作，佢都會關心對方嘅安全設施。」
五虎中除了梁朝偉外，其餘四虎會經常見面，至少每年一次，三哥坦言很珍惜這些日子：「除咗偉仔少見啲，我哋幾個每年至少會有一餐團年飯食吓，過年前點都會抽個時間大家睇吓喺唔喺香港，出嚟食餐飯敍一敍見個面，傾吓屋企嘢。」難得見面大家的話題都不會涉及工作或利益，幾個大男人從來未試過鬧交：「搵唔到乜嘢理由要鬧交，我哋平時各有各忙好少見，所以喺埋一齊時就食飯，大家寒暄吓互相問候，點會鬧交，冇可能去到呢個題目。」
向影帝偷師
今次拍《掃毒2天地對決》，三哥除了和華仔相逢外，他與古天樂亦有很多對手戲。其實兩人一早認識，當年三哥經營眼鏡生意時，曾找古仔做其中一個品牌眼鏡的代言人，不過拍戲的確是首次。三哥指古仔臨場有很多即興想法，令角色更立體生動：「有場戲我要保護佢去慈善機構，劇情原本佢係拎一蚊出嚟捐錢，跟住我啲夥計話佢使唔使咁寸，佢就加咗句對白：『嫌少呀？』原來佢一早安排劇中手下袋多一毫子，嫌少就畀多一毫子，一蚊之餘多一毫子仲叫人開單。呢啲古仔係喺現場諗，令觀眾覺得佢衰之餘又幾幽默，睇落會有啲輕鬆，令個角色更令人深刻。」而三哥謙稱今次跟兩位影帝合作獲益良多，更可從中偷師。
撰文：王連連
攝影：陳慧安
場地提供：香港九龍貝爾特酒店