利物浦星期日喺社區盾以1:1逼和曼城，結果互射12碼以4:5落敗，失盃兼無法報上季英超之仇。不過，紅軍領隊高普就好有風度，要球員喺頒獎禮期間都留喺球場。亦有唔少球迷認為，高普呢招係激將法，目的係要一班球員記住失落獎盃嘅滋味，希望佢哋今季可以爭口氣，力壓藍月高舉英超獎盃。上季紅軍同藍月鬥得難分難解，最後藍月以一分之微力壓紅軍衞冕英超。