【本報訊】全港七區罷工集會，迪士尼成為第八區。香港迪士尼樂園職工會昨午在迪士尼樂園度假區近停車場位置舉行罷工集會，中午大約有40名員工出席。他們高叫「香港人加油」、「沒有暴徒只有暴政」、「林鄭下台」等口號，不時有無穿制服的迪士尼員工趁午飯時間前來探望同事。
轟卸責示威者
工會主席鄭麗兒表示，在場員工大部份是「真．返工」，所以也是「真．罷工」，她指知道七區都有大型集會，不同行業都支持，但他們遮住員工證上載照片，卻又被撐政府聲音指摘造假，所以有意用真正的員工身份發起集會。
餐飲部員工朱先生批評林鄭將問題推卸予示威者，把問題的因果扭曲，「佢成日喺度講，呢個運動已經變形變質，根本嘅問題癥結係乜嘢呢？邊個推條條例出嚟呀？佢唔反思，唔知點解佢會咁」。他認為林鄭月娥只要回應市民訴求，「解決好簡單咋嘛，你咪試吓撤回囉，話激烈你咪特赦囉，當粉筆字抹晒佢。你一啲悔意都冇，人工就照出，一味譴責譴責，咁歸根究柢點樣解決呢？我唔知佢背後有乜壓力，咁簡單嘅嘢都唔做，作為一個人好難理解呢件事」。
與被捕菲籍舞蹈員同部門的娛樂事務部員工羅小姐則說，本來希望罷工對政府有造成壓力，「但今朝睇完10點鐘回應都覺得冇乜用，不過要照做，佢（政府）唔理一回事，但其實可以畀其他人、國際社會睇到，香港人可以好齊心」。她表示幸運是自己一家人立場一致，比其他因政治立場鬧翻的家庭幸福，「我阿媽仲鬧得甘過我」。
■記者袁楚雙