明報形容鍾庭耀年屆花甲，那麼日日閒到嘔白泡的梁翁，肯定是花甲老翁。（話時話，花甲梁跟飛天南，好匹配。）以其花甲翁之身，除了數本報全版廣告，就係睇勻18區校長副校與老師的fb，揪人出來行私刑、做義和拳。近日卻忽然豪擲一百萬懸賞，煽人篤灰，搵到擲五星紅旗落天星碼頭個海的嫌疑犯，一經定罪，就能領賞。在不割席無大台的抗爭者中間搞分化，呢鋪花甲梁可以慳返。但對家那邊的無腦白衫，確認梁翁一百萬穩賺，於是乎自行製作罪證，鄉黑入冊，安家費一百萬，扣除製作錄像成本，打五折都有五十萬，比721藤條打仔那一夜好搵。江湖傳聞的錄音中，直指藤條打仔那筆尾數，收極唔齊。齊上齊落？搵白衫笨實！花甲梁雖然退役，愛國程度比何君靠得住，元朗鄉黑，諮詢過他們的真大佬元朗之光鄧二哥的專業意見後（佢社工系畢業喎）堅決唔罷工！瞓身「做嘢」！全港紅旗等住插水！網友預約小鳳姐，一支旗一百萬，湊夠50白衫大漢，花甲梁冇申報那五千萬，一夜間如黃大仙警察宿舍外的炮仗，熱烈彈琴熱烈地散！