跌咗個橙執番個桔。近日盛傳曼聯向意甲班霸祖雲達斯斟介阿根廷前鋒保羅戴巴拿，據講因為紅魔唔願意付出對方要求嘅35萬鎊（約330萬港元）周薪，搞到交易要拉倒。曼聯隨即轉移目標往另一「斑馬」前鋒、克羅地亞射手文迪蘇傑身上，打算以1,500萬鎊（約1.4億港元）轉會費收歸旗下。
官宣馬古尼加盟
英超轉會窗到周四就關閉，曼聯嘅組軍萬事俱備只欠前鋒，球會今夏羅致咗丹尼爾占士同雲比沙卡之後，再同李斯特城傾掂數，周一正式宣佈，以破後衞轉會費世界紀錄簽入中堅哈利馬古尼，馬古尼首次着住曼聯波衫見球迷，蘇B下一步就想簽入一位啱佢心水嘅前鋒。
紅魔之前同祖雲達斯就交換盧卡古同戴巴拿嘅交易進行談判，據多家傳媒報道，兩球會之間已經傾好轉會費條件，而盧卡古亦都已經同祖記達成個人條款協議，呢單交易最後搞唔搞得掂，就取決於戴巴拿肯唔肯去曼聯，不過有指呢名25歲阿根廷前鋒，始終希望可繼續留喺祖雲達斯，就算要轉投曼聯，薪金要求亦非常高，索價35萬鎊周薪，亦係僅次於曼聯前鋒阿歷斯山齊士之後嘅英超第二高薪，曼聯薪金支出屬英超第一，諗諗吓決定唔落叠。
文迪蘇傑更抵玩
戴巴拿未能入魔，曼聯同祖雲達斯嘅交易都仲有成事可能。祖雲達斯方面仍然希望可以搞掂盧卡古，紅魔主帥蘇斯克查亦唔想留用呢位比利時中鋒，適逢球會睇中祖記另一射手、33歲嘅前克羅地亞國腳文迪蘇傑，可以作為將盧卡古賣去祖記之後嘅替補人選。
相比起戴巴拿，年紀大接近10年嘅文迪蘇傑，不論喺轉會費同人工都抵玩得多，預計曼聯只要支付約1,500萬鎊轉會費，同埋12萬鎊周薪條件，呢份人工亦比文迪蘇傑目前喺祖記所賺高出大約35%，成事機會相當高。
文迪蘇傑自2015年由馬德里體育會轉投祖雲達斯，作風低調踢法實際，上年球王基斯坦奴朗拿度（C朗）加盟祖記，佢都仲有啲表現，喺上季意甲上陣25場攻入9球。