特首林鄭月娥自22日後一直匿埋唔見記者，只係去大大小小建制派酒會，即使差人同抗爭者對抗升級，佢仲笑得鬼咁開心，到噚日全港大罷工，佢終於肯見記者，但只係將責任推晒畀抗爭者，宣佈將佔領時每日差人舉行嘅「四點鐘許Sir」記者會翻生再用，就當係交貨，唔只民主派狂鬧佢，連建制派都有人頂唔順，民建聯立法會議員蔣麗芸就喺fb出po鬧埋一份。
蔣麗芸喺記者會後於個人fb專頁發文，元秋完全唔留手咁，話對林鄭個記者會好失望：「林鄭特首在記者會上提出很多問題！但解決方案呢？失望！！！」連元秋講到咁白，林鄭記招有幾廢，怕且唔使八方多講。
七千網民留言抽水
不過元秋呢個po引起網民熱烈討論，到噚晚已有7,000幾人留言，相信係元秋最多人留言嘅po，大部份人都係借機抽水，有人話「Ann姐呢啲咪講人話，支持Ann姐做國家主席」、「支持Ann姐取代林鄭」等，更有網民質疑「Ann姐係咪又未轉acct？」、「俾人hack咗account？」有人仲話元秋應該做民建聯黨魁，雖然大部份時間佢都係亂噏，但有senses上嚟，真係民建聯無人能及，尤其係去咗韓國嘆咖啡嘅李慧琼，真係要向佢多多學習！
李八方