香港反送中的集會遊行遍地開花，民間昨日發起8.5「三罷」行動，罷工、罷市及罷課，分別在七個地區舉行集會。《蘋果》昨日走訪多個集會地點，昨午在大埔風水廣場現身的杜汶澤受訪時，除大罵警方拘捕女示威者時扯脫其內褲，更冷諷早上特首林鄭月娥舉行的記者會：「佢最重點係講咗八個字，就係『光復香港、時代革命』，有料到。」而到中環愛丁堡廣場支持藝文界的歐錦棠就呼籲：「認罪悔改啦，林鄭！」
阿澤嘲講嘢有料到
杜汶澤昨午約1時許現身大埔風水廣場，他搞笑地說：「我以為今日係撐警集會，一心撐警，支持警察，還警察一個公道，成立獨立調查委員會，差人好慘，成日俾人冤枉唔得嘅，所以要成立獨立調查委員會，查班冚家Ｘ，睇吓邊一個冚家Ｘ唔生性做人，就拉個冚家Ｘ去坐監。」阿澤又冷諷林鄭昨早舉行的記者會，表示他如廁時聽到幾句：「佢最重點係講咗八個字，就係『光復香港、時代革命』，佢又講得唔錯，剛柔並重，個冚家Ｘ，突然間又會講嘢咁叻，有料到，將重點講咗出嚟，終於有個記者會係冇重複，有新思維灌輸畀大家。」
眼見昨日有這麼多人參加集會，會否覺得大家可以繼續走下去，迫使政府面對，阿澤反問：「邊有嘢係唔使面對，你有冇試過欠債唔使還，嘥氣啦呢啲，呢啲死梗，一定要還，係遲早問題。」阿澤坦言每日有變數，很難只能見步行步，他說：「唔可能話今日七區集會罷工之後點呢，今日唔做，唔知聽日做啲乜，只可以一步一步支持，一步一步行落去。」
採訪︰馬建華
攝影︰葉君海
歐錦棠鬧推警民對立
歐錦棠夫婦和卓韻芝昨日到中環愛丁堡廣場香港大會堂低座空地舉行的「藝文界罷工集會」。歐錦棠指自己不是罷工，他說︰「我支持我夥計唔使返，咁夥計都唔返，個老細返去做乜呢？一個態度，唔係要影響別人嘅情況下癱瘓個社會，冇人想行到呢一步，呢步未係最差㖭。」提到林鄭昨早舉行的記者會，歐錦棠說︰「邊個令到個社會咁呢？今朝10點出嚟講嘢，撥火嗰個。所有人不論顏色黨派，蔣議員（蔣麗芸）今朝都話搞問題嗰個，唔解決問題，好失望。過往一次遊行都冇去過，超和理非，當然所有人都反對暴力，佢哋都逆轉。」
歐錦棠續說︰「你冇負起任何應有嘅責任，佢仲邊有資格管治呢個地方？仲邊有資格帶領呢個政府？每一個有常識、有良知嘅市民，都知道問題可以點樣去解決。五大訴求你咪唔好一次過找數，咁你都絲毫不肯讓，係要推警民對立，何苦呢？」他說看完記招後懷疑自己是否在另一空間︰「喂！老婆係咪重播嚟㗎？」問他有何說話想對特首說？他說︰「認罪悔改啦，林鄭！」
採訪︰張明
攝影︰仇志德
阮民安非個人是良知
男子組合E-Kids成員、兩子之父的阮民安（Tommy）昨日到旺角麥花臣球場出席集會，Tommy坦言：「我同所有香港人一樣係嗰五大訴求，今朝聽埋林鄭記者會，佢仲想繼續分化大家，完全冇正視問題，佢仲話跟住以後每日都會開記者會，佢係想畀藍絲或中立人睇見每日發生嘅畫面。」提到警方在天水圍拘捕女示威者時扯脫其內褲，Tommy說：「太太以前住天水圍，我對呢區有一個特別諗法，見到個女仔俾人咁對待，我相信全港巿民同我一樣非常之嬲。」
問到Tommy可擔心安全？他續說：「呢樣已唔關乎我一個人事，好多人都出嚟支持，唔只係政治層面，係良知。我自己都有兩小朋友，我做咗人老竇，上周六行過旺角，見到啲後生仔喺度幫大家做緊嘢，我希望到囝囝六、七歲時問我，點解咁多人行出嚟，可以同佢講爹哋都有出去。」他更指自己堂哥是做警察：「佢短訊我，我同佢講唔想俾人叫佢『黑警』或唔好聽嘅形容詞，做返一個人囉，我相信每個部門都會有好人，娛樂圈都會有仆街，可能警方都會有好人。」
採訪、攝影︰徐錦池、孔志豪
袁彌明責警侮辱女性
人民力量前主席袁彌明昨日到金鐘出席集會，她力斥警方暴力已經去到一個失控的程度：「例如落街買嘢嘅街坊，不論男女，或媽媽級買完餸返屋企，小則俾十幾個警察兇，大則扑人頭至血流披面，啲警察簡直黐咗線！」可覺得警方暴力清場太過份？袁彌明說：「係，我覺得警隊最近嘅精神狀態係好值得研究，我覺佢哋情緒已經失控，情緒精神崩潰。警察問題真係要正視，真係去到毫無法紀。現在都可以喺天橋射兩發子彈落嚟。」
袁彌明透露前晚在銅鑼灣，催淚彈的煙久久不散，她說：「你諗吓幾多住宅喺上面，咁密集嘅區域。呢啲政府、林鄭都要出嚟交代一下。」對於前晚天水圍有女示威者被捕時被扯脫內褲，袁彌明覺得很過份：「個女仔都責怪自己得裙着，男警好似秤豬咁秤佢，又講啲侮辱女性嘅字句，女仔出街有時真係行過，唔係示威，但唔睬佢都可能拉你，咁人嘅安全好受威脅。」
採訪︰卓寶花
攝影︰陳慧安
王宗堯質疑防暴手法
王宗堯昨日身穿「Never give up」字樣的T恤現身金鐘集會，提到警方清場時出現的暴力行為，他表示：「好多巿民都被人打，無差別嘅打人，如果話啲人喺示威區，我覺得係可以清場，但係你見啲黃大仙居民，喺民居度放咁多粒催淚彈。」王宗堯更透露前晚嬲到失眠：「其他嘢我哋當然都好嬲，但噚日最嬲係嗰個妹妹被人扯甩咗條底褲，我哋會覺得，咁多個防暴警察去制服一個女仔，而你任由佢甩咗條底褲咁樣抬佢走，係非常之侮辱性嘅，大家好嬲！大家噚晚瞓唔着嘅原因最主要都係咁樣。」他提到前日警方在他家樓下放催淚彈，樓下大堂滿佈煙霧，他家中有寵物，幸好回到家發現有開風扇及抽氣機。
採訪︰卓寶花
攝影︰陳慧安
