立法會喺唔少香港人心目中已經冇尊嚴可言，不過都仲有啲規矩要遵守嘅，例如因應大樓未修復好而搬咗出去大樓公眾入口外嘅立法會咪兜，仍然限制只准議員使用，不過，民建聯立法會議員陳克勤，噚日中午竟聯同兩位身兼區議員嘅黨友中西區區議會副主席嘅陳學鋒，同油尖旺區區議會主席嘅葉傲冬，一齊違規埋咪兜見記者，仲要全程無受阻礙。
八方事後向幾位查詢，何以可以違規使用咪兜？陳克勤都窒咗窒，即時致歉，話𠵱家立法會情況好混亂，咪兜搬咗出大樓外令佢有所混淆，以為嗰個唔係正式咪兜，如果喺大樓裏面警覺性會高好多，唔會帶兩位黨友出去。不過立法會秘書處其實喺咪兜旁邊豎咗個牌，寫明「臨時採訪位置的採訪麥克風架只供立法會議員接受傳媒訪問」，佢哋真係唔好咁「盲目」喇。