【港聞專題】
是夜，30個廿歲出頭的年輕人齊聚於活動室，每兩人一組，相互對視，現場氣氛劍拔弩張。扮演攻擊一方的磨拳擦掌，想要把對方用力推跌在地；防守一方則兩腳分開，雙膝微曲，紮好馬步，甚有穩如泰山的氣勢。大家推撞一輪過後，教練Edward拿出在家自製的道具刀，向眾人問道：「雖然教咗大家防守同攻擊，如果對方有刀，你要點做呀？」有學員馬上高呼：「報警囉！」全體同人群起攻之：「冇用㗎！報警有用，我哋就唔使喺呢度啦！」
記者：陳芷昕
他們上的這門課，叫做「搏擊及防身術基礎體驗班」，發起人是22歲的阿康。7.21當晚，他從網上直播新聞看到元朗爆發白衣人無差別毆打途人的恐襲，自中學畢業後開始學習拳擊的他冒起了開班授徒的念頭。於是，第二日傍晚，他在facebook公開發佈帖文：「我可以免費舉辦拳擊興趣班，有興趣嘅話下面留個名。#保護自己 #全民尚武。」他本來以為，帖文應該會石沉大海，因為去年他也曾發起開辦類似課程，卻無人問津。隔了幾個小時，帖文已獲過百人回覆。大家紛紛「留名」，反應之熱烈讓阿康始料不及。
「好多好瘦好細粒，隻手睇落係一啪就會斷嘅女仔都嚟上堂，真係好感動，因為咁都肯企出嚟保護自己同身邊嘅人。」
24歲的Edward也在當晚看到阿康的帖文。自中三起學習詠春、去年起學習空手道的他，馬上決定私訊阿康。互不相識的兩人一拍即合，馬上着手為訓練班做好準備。阿康負責編寫教案，課程的參考資料來源，就是今年6月以降香港發生的一連串衝突事故影片。像於7月12日在九龍灣連儂牆，有青年遭一名中年漢狂毆13拳，阿康把相關影片翻來覆去看了好幾次，仔細研究其「拳法」；元朗白衣人的佈陣、規模、戰術和他們手持的藤條、鐵通、長棍等武器，他也續一仔細記錄下來。「集各家之大成」後，最終編成「 CBSD（Combat and Self Defense）1001」的課程大綱。
安排場地、教練、裝備的責任，則落在Edward身上。為了還原現場戰況和模擬過往兇徒的攻擊模式，除了練習用的拳套以外，他更準備了背囊、棍、靶和道具刀。「木棍係以前學武用剩，諗住教『書包防衞術』時，可以感受到比真木棍打嘅衝擊力係點」。他繼續介紹供導師扮演兇徒的自製道具刀，「主要係用一啲之前用剩嘅膠地板，貪佢有一定韌性同埋硬度，跟住用鉸剪剪出個軍刀形狀，再用𠝹刀修邊，之後用封箱膠紙包實佢」。他還特意仿照真軍刀的模樣去製作，希望能讓學員在練習期間更投入。
一切準備就緒後，兩人在元朗恐襲後的幾天內，就一口氣開辦了三節課程，每節三小時，合共幾乎來了近百人。「本來以為只會得小貓十零隻，點知次次廿幾三十個，做乜鬼！」不只是參與人數，女性比例之高，也讓Edward大呼驚訝。「我開頭以為會係9比1，男9女1，點知係6:4比。好多好瘦、好細粒、隻手睇落係一啪就會斷嘅女仔都嚟上堂。真係感動呀，大佬，你咁都肯企出嚟保護自己同身邊嘅人」。巾幗不讓鬚眉，牛高馬大的Edward也對「港女」深表佩服。
記者參與了其中一節課程，現場所見的確不乏看起來嬌滴滴的瘦弱女生。22歲的Erica和Joe是當晚的學生之一，穿着T恤和熱褲的她們，一個梳着兩條鬢辮、頭上悉心地繫上一個韓式寬髮帶；一個細緻地畫上櫻桃粉紅色的唇蜜。此時此刻，兩人正面對面練習拳擊。「元朗件事之後，覺得警察保護唔到我哋，所以要自己學識點去保護自己先。同埋𠵱家出去遊行表達意見，可能一個好和平嘅遊行，都會有好危險嘅事發生，我唔想成為人哋嘅負累」。沒有運動底子的她們，看起來有點手忙腳亂，出拳有氣無力，但二人還是繼續專心練習。
非常時期，全民習武，皆因恐懼。阿康說，從學生的提問便可一清二楚，「我本身諗住搞體驗班，等大家強身健體，我唔覺得係乜嘢嚟。但變咗𠵱家有好多人會問一啲好specific嘅問題：『俾人用棍打、圍毆咁點算呀？』大家都好驚，如果呢啲暴力發生喺自己身上，咁可以點做？」
這也是二人開班的初心。7.21之後，香港人人自危，擔心出入不再平安，因為現在香港人只能自己靠自己。「學柳俊江咁講，點解要我哋自己保護返自己？香港人有交稅，香港又有執法人員，點解𠵱家係要我哋自己做？咁我哋交稅嚟做乜呢？」Edward在元朗恐襲當日，隔着手機屏幕看着元朗警署落閘關門，999不被接通，警察事隔39分鐘才姍姍來遲現身元朗站，任由白衣暴徒毆打普通市民……他哽咽地說：「有啲後生仔想保護老弱婦孺，但佢哋唔識，見到我好心痛，我又出唔到去幫佢哋。所以惟有教識佢哋下一次遇到暴力事件時應該點做，因為警察已經幫我哋唔到啦。」
阿康指，習武講究心技體：「心態要改變，技術要學習，體能要提升。」不只為傳授防身術，他更希望學生能藉課堂練習，「體驗」暴力，從而減少恐懼。「好多平常人見到暴力時係完全唔識反應，原因係佢哋未見過咁大規模嘅暴力事件，或者冇感受過暴力係咩，所以喺事發時，除咗被攻擊，同時都會好震驚。所以如果我開班俾人感受一下俾人打係咩感覺，少少啫，慣咗之後就會相對冷靜。咁可能到面對一個真正嘅暴徒時，就可以冇咁驚，可以盡量做多啲防守去保護自己」。
阿康更笑指在拳擊界眼中，那些暴徒其實不算強。「大部份其實都係亂嚟，唔識打。13拳嗰個相對叫做打得好啲，佢有少少鈎拳」。他深信，即使是普通人，只要多加練習，沉靜以對，面對暴徒不一定只得捱打的出路。「唔好怕佢哋，佢哋未受訓練其實係唔識發力。大幅度唔代表大力，大份亦唔代表大力，你細細粒但識發力都可以有個勁出嚟」。
但二人強調，開班授徒並非要訓練民兵，變成攻擊對方的「暴徒」，一切以防守和保護自己為上。初學者隨意主動攻擊對方，容易招致更大的危險，「佢哋打完之後，你縮走、向後，唔好攻擊，走得甩就走，唔好打蛇隨棍上」。他們從來沒有攻擊對方之心，「我都預咗有人話我哋係咪要訓練另一批武力去周圍打人，正正就唔係咁。我哋普通人只係想好好保護自己，唔想俾人打之嘛。我好哋哋做咩要周圍打人？我哋只係用最低嘅武力去阻擋對方嘅攻擊，唔想畀人打得咁甘。同埋話畀佢知：我唔怕你，唔會坐定定畀你打。如果我哋擋完佢停，咁咪停囉」。訴諸暴力無法解決問題，「用拳頭打返黑社會係冇意思，根治唔到問題。最後我哋都係要用政治手段同法律制度去處理問題」。
「港人慣咗安逸，好似俾人養住嘅港豬咁，有事都應變唔到。發生過一次咁嘅事，就會諗有第二次，惟有自己做好準備。」
只是，自6月以降，除了黑勢力的出現，警方採用的武力程度亦與日俱增。這種相對「土炮」的拳腳訓練，面對真槍實彈，可有實則作用？「如果你面對坦克嘅話，拳腳一定唔係對手」。但阿康認為，習武這回事，有勝於無，「就算好兇險時，真係有刀，如果我咩都唔識，就咁攤係到俾你斬一刀；但如果我學識搵雙手擋住頭，可能捱到呢一刀呢？無論咩情況，識得防守點都好過咩都唔做」。
更何況，香港陰霾密佈，當暴力成為常態時，有一技傍身，實屬必要。「香港人慣咗安逸，冇試過有任何危險，真係俾人養住嘅港豬咁，當有事發生時都應變唔到。以前都冇諗過香港可以發生啲咁嘅事。發生過一次，就會諗會唔會再發生第二次，所以自己惟有做好準備」。自己香港自己救；香港人，也只能自己救自己。