【本報訊】警方昨凌晨在黃大仙武力鎮壓市民，連長者也不放過。過百防暴警約凌晨零時許由沙田坳道向東頭村道推進，多名長者組成的「守護孩子行動」站在行人路上築成人鏈向警員求請，包括早前絕食的73歲陳伯，沒有佩戴任何裝備下向警游說，「我哋手無寸鐵，但警察全部都冇人性，用盾一個個咁打同兇。有兩個警察用長盾猛烈推我心口」。
陳伯隨即被跌倒並捲入盾底，更被警員箍頸，他哽咽道：「都唔知箍咗幾耐，我係由鬼門關走出嚟。」陳伯因此鼻子紅腫、手腳受傷，斥責警方做法令人痛心，又籲年輕人和平抗爭，勿被憤怒蒙蔽理智。
同行的85歲黃伯也被盾推跌，令膝蓋受傷要以輪椅代步，「打咗兩個觔斗再起身求情，同佢哋講，香港人唔好打香港人啦」，惟警方續向前推進，受傷的黃伯由街坊抬入屋邨，但便衣警仍追入邨，幸有街坊幫口把警罵走。
警邊笑邊噴椒
「守護孩子」發起人、好鄰舍北區教會傳道人陳凱興說，原本游說行動十分平和，長者們也收起裝備，免氣氛緊張，但警員不但推跌長者，還有後排警員在游說時突然施放胡椒噴霧，「警察係陰我哋，擺到明係想我哋食一嘢，仲有警察係笑緊」，斥警已超越道德底線、人類界限，「點解可以連阿伯阿婆都打咁冇人性？」
■記者李詠希