【娛樂人物】宮崎駿愛情觀薰陶 陳明憙壞腦

【娛樂人物】
宮崎駿愛情觀薰陶 陳明憙壞腦

香港音樂人陳少琪的女兒陳明憙是圈中出名的日本動畫大師宮崎駿的粉絲,於是去學日文,又因為久石讓學樂器及唱歌,也令她創作的作品有古典及流行樂的元素,就連愛情觀,《千與千尋》的主角白龍是超級完美,她笑言要保住純真,等待她的「白龍」出現。

現年27歲的唱作女歌手陳明憙自小便迷上宮崎駿動畫,對宮崎駿的《天空之城》、《龍貓》、《千與千尋》和《哈爾移動城堡》等作品琅琅上口,宮崎駿的工作室今個月在港舉行「吉卜力的動畫世界」展覽,在展覽上還原動畫場景,陳明憙早前接受《蘋果》專訪,直言深受宮崎駿的影響,她說:「我好鍾意睇動漫,係超級宅女,亦因為咁去學日文。」

愛久石讓

除了宮崎駿動畫世界的故事吸引,陳明憙直言久石讓的配樂也深深打動她,她說:「因為配樂,所以我學玩樂器,以前好鍾意《千與千尋》嘅《夏日》,記得以前學琴連考試都唔想考,係要練好呢首歌先,亦試過用唔同嘅樂器去彈奏宮崎駿嘅歌,第一首識彈嘅係《天空之城》,影響到𠵱家寫歌都希望可以結合到古典樂同流行曲。」問到如何認識宮崎駿,她透露因為父母都是他的影迷,耳濡目染下自己也愛上:「所有作品都睇晒,我記得細個有一段時間我係會着住藍色衫紮住孖辮,模仿《天空之城》個女主角咁,夜晚瞓覺都要爸爸媽媽好似男主角咁抱我上房。」

動畫也影響陳明憙的愛情觀,她笑言:「好多套作品入面嘅男女主角所經歷嘅,都係好有意義嘅事,永遠係互相幫助去做一啲好夢幻嘅事,亦都毀壞咗我對愛情嘅睇法,因為作品入面實在太高要求,真係睇壞腦。好似《千與千尋》個男主角白龍超級完美,現實生活邊度搵條龍返嚟,如果要貼近少少《夢幻街少女》入面男主角天澤聖司,識彈又識整小提琴,同女主角喺圖書館相遇,現實中去邊度搵?」問到會否為找到另一半而降低要求,陳明憙笑說:「唔會,我暫時都會保持住純真,等我嘅白龍出現。」

陳明憙自爆因愛上久石讓的配樂才去學樂器。

加強環保

此外,宮崎駿的環保意識也感染了陳明憙,如她在今個月底推出的新作,MV就遠赴青海拍攝,她說:「拍攝地方全部都係大自然景色,唔想硬推環保呢個議題,想令大家關注其實可以拍一啲好靚大自然景,令大家愛上咗先。」
採訪:曹家誠
攝影:陳俊強
場地提供:House 1881