張曦雯近日到南非拍攝節目，連日來她都在社交網貼相分享當地的靚景及點滴，不過張曦雯直言有點辛苦，她前晚回覆傳媒時說：「嗰邊天氣好凍，溫差好大，我係帶唔夠衫，去到已經要買，我第二日就凍病咗，成個trip病住開工，好辛苦。一off camera我就不停擤鼻涕，搞到眼腫臉腫。」
雖然身體抱恙，但張曦雯獲安排到水族館潛水，與四、五條巨鯊為伴，她說：「帶我哋潛入去嘅老師好緊張，要我哋緊貼住佢，唔好離隊，佢教我哋貼近缸底潛水，啲水好凍似冰水。」張曦雯又到非洲大草原觀光，其間遇上一隻野生長頸鹿，她說：「我聽講過長頸鹿後腳好有力，可以踢死獅子，我都怕危險，好怯唔敢行咁近，不過我用英文讚咗長頸鹿一句佢好靚，長頸鹿好似好懂性咁烏低親近我，佢係咁用個頭嗲我個頭同對手，好得意，估唔到佢雖然係野生都接受人類畀佢嘅愛，好彩可以同佢互動。」
採訪：陳杰