上個星期六喺深圳上演的法國冠軍盃，巴黎聖日耳門（PSG）喺半場落後一球下，靠基利安麥巴比同埋迪馬利亞射入靚絕罰球反勝雷恩，連續七年捧走法冠盃。不過賽後就發生咗非常耐人尋味嘅一幕，話說影大合照嗰陣，麥巴比竟然推開因為停賽冇上陣嘅尼馬，唔通PSG內部都出現深層次矛盾？
話說自從尼馬被傳同PSG高層攤牌，希望今個夏天轉會窗離隊之後，尼馬同PSG嘅關係就非常撲朔迷離。之前就有傳PSG會用對付拉比奧特嘅方法對付尼馬，就係由佢喺度但唔畀佢踢，直至兩年合約完結。
PSG開始封殺尼馬
唔少心水清嘅球迷都發現，PSG以前官方社交平台間唔中上載片同相嘅主角都係尼馬為主，不過近期就忽然少咗好多呢位巴西球星嘅相。最明顯不過就係「飛人牌」早前拍攝宣傳PSG新波衫嘅短片，主角竟然唔係「一剔牌」代言人尼馬，改由麥巴比頂上，睇嚟封殺傳聞都似層層。
尼馬因為上季法足盃決賽之後打雷恩球迷被罰停賽三場，所以今場只能夠做座上客睇隊友表演。當球隊捧盃嗰陣，鏡頭所見尼馬企喺側邊，個樣都唔係好開心咁，但係意大利中場馬高華拉堤就叫佢埋嚟一齊慶祝，當時就見到都喺附近嘅麥巴比仲搭住尼馬膊頭。
不過，之後去到影大合照嗰陣，鏡頭又見到尼馬個樣悶悶不樂咁，結果喺隔籬嘅麥巴比終於都忍唔住怒火，一嘢就扯尼馬埋嚟，然後一個「如來神掌」將佢推開。結果最後都係華拉堤叫尼馬返過嚟，佢先一齊影大合照。
傳巴塞諗計先借後買
睇到段片嘅人，都相信麥巴比呢吓「如來神掌」已經超出普通打鬧，似乎仲動咗真火。到底兄弟間係咪有咩不和，真係不得而知。不過，之後尼馬就喺個人ig上載搭回程飛機嗰陣，同麥巴比一齊影嘅合照，仲加埋一句「我嘅兄弟（[email protected]）」，力證感情未變。
至於尼馬最後係離隊定留隊，最近就有傳前球會巴塞隆拿會用先借後買嘅方式帶尼馬返西甲，睇嚟呢場大龍鳳未到轉會關窗最後一刻都會繼續日日上演。