反修例運動如星星之火燎遍十八區，前晚警察搞到去黃大仙，要班街坊着住拖鞋守護家園，黃大仙嘅建制派區議員全部唔見人，俾街坊鬧爆，不過又唔怪得佢哋，作為第一大愛國愛港政黨民建聯主席李慧琼，俾網民野生捕獲佢喺香港風雨飄搖日子，竟然仲有閒情去韓國首爾嘆咖啡！
出po譴責侮辱國旗
琼子前日不忘出post譴責有示威者侮辱國旗，但網民金水噚日喺fb專頁轉載網友嘅「韓國直送」照片，原來佢根本不在港，相中見到身穿深紅上衣琼子，同一名男子喺咖啡廳飲緊咖啡，金水嬲爆爆話前晚黃大仙居民先食完催淚彈，琼子就嘆咖啡，「畀噚晚喺黃大仙食咗催淚彈而之前投咗民建聯嘅街坊睇：你投咗咩人？11月一票不投保皇黨！」