阿根廷球星美斯因喺今夏美洲國家盃期間，怒斥南美足協同執法球證，上星期五俾南美足協判罰停踢國際賽三個月。
美斯喺上月對智利嘅美洲盃季軍戰領紅被逐後，炮轟南美足協貪污腐敗同球證執法不公，仲話今屆賽事全部利益歸於主辦國巴西。雖然美斯之後已就其言論致歉，但南美足協認定佢行為不當，罰佢停賽3個月兼罰款5萬美元（約39萬港元）。
美斯嚟緊會缺席9月同10月對智利、墨西哥同德國等友賽，加埋之前喺美洲盃季軍戰領紅停賽一場，下年3月展開嘅2022世盃外圍賽都冇得踢，美斯有七日時間可以上訴。
美斯同南美足協結怨，事緣係阿根廷喺準決賽0:2不敵巴西後，不滿球證嘅裁決出現嚴重失誤，冇向粗野攔截嘅巴西作出判罰同警告，連阿根廷足總事後都向南美足協投訴，但得到嘅回應竟係話佢哋「沒有事實根據」同埋「缺乏相對尊重」。