上星期六同香港一河之隔、連續兩屆喺深圳舉行嘅法冠盃決賽，由上季法甲冠軍巴黎聖日耳門（PSG）鬥法足盃冠軍雷恩，PSG今場雖有尼馬同達斯拿停賽，不過仍然靠基利安麥巴比入波同迪馬利亞射入靚罰球，以2:1反勝雷恩，成功一報上季法足盃決賽輸波之仇，自2013年起連續7屆捧走法冠盃，喺法甲開季前再次先聲奪人！
麥巴比迪馬利亞建功
由於上屆法足盃決賽，巴西球星尼馬賽後打球迷被罰停賽三場，所以今場法冠盃只可以坐喺看台睇波，不過PSG陣容仍然強勁，除咗球星麥巴比同卡雲尼擔正外，新加盟嘅兩位西班牙兵安達靴里拉同沙拉比亞都正選上陣。而且因為比賽喺中國上演，兩軍嘅波衫今場都搞搞新意思，波衫上嘅球員名都由英文變咗做簡體中文，迎合內地球迷嘅需要，或者睇直播嘅球迷可能會睇唔慣。
另外唔慣嘅可能係PSG一班球星，雖然佢哋已經嚟咗中國備戰咗成個星期，但開波似乎仲未入局，攻勢威脅都唔係好大；結果上半場13分鐘，對手雷恩一次右路傳中，前鋒胡奴奧有越位嫌疑下，搶先PSG後衞喺門前射入，幫雷恩領先1:0。落後一球嘅PSG起勢咁攻，中場馬高華拉堤一腳遠射亦好有威脅，不過半場仲未能追成平手。
結果要去到下半場57分鐘，PSG中堅馬昆奴斯哥利亞突然一腳長傳，沙拉比亞突破越位殺入禁區傳中，麥巴比門前輕鬆射入追成1:1；三分鐘後，PSG換入迪馬利亞加強攻力，結果呢位阿根廷中場成為救世主，喺73分鐘禁區頂射入靚罰球，入波後迪馬利亞更興奮到除衫慶祝，最終PSG以2:1贏波成功捧走法冠盃。
靴里拉迎新載歌載舞
另外PSG早前喺中國舉行咗球會傳統嘅迎新活動——天才表演環節，其中前曼聯球員安達靴里拉表演慾強，一邊高歌一邊跳舞令隊友留下深刻印象，佢仲話好想為PSG繼續創造歷史，仲大讚巴黎係世界上最靚嘅城市；不過鬧緊轉會嘅尼馬可能就唔係咁諗喇！事關佢日前落選咗FIFA最佳球員最後10強，錯失咗額外300萬歐元嘅獎金，更有傳佢同新體育總監李安納度面阻阻，睇嚟尼馬嘅轉會風波都會幾影響嘅士氣！
