「威威哥」最近做咗爸爸當然值得開心，但要搵奶粉錢一啲都唔容易，尤其年紀越大，競爭力相對降低。威威哥唔係一線小生，向來都係搵朝唔得晚，冇工開嘅日子，都要靠其他技能賺錢，好似揸的士、搬貨、教唱歌、教游水等，總之搵到食嘅乜都要做。
威威哥當年離開公仔箱，都係因為工作量少，諗住出去闖吓，點知又係政府唔發牌畀「百科」，咁大家開工機會就少咗。我姐匙最近同一位幕後朋友吹水，話原本安排咗威威哥返公仔箱幫手拍一部劇，當然唔係主角位，發揮機會亦唔大，但總算係重返公仔箱嘅第一步，威威哥都知道人工唔高，但為未來鋪路，即使要推job，都度期返公仔箱拍劇。但由於威威哥係自由身，最近幫過隔籬台拍劇，其實都係小角色，但公仔箱高層「方丈」知道監製用咗威威哥，即勒令話「唔得，要轉人」，威威哥最終試埋造型都冇得留低，聽見都幾心悒。
俾方丈玩完，都冇得嬲㗎，一台獨大嘛。早前公仔箱另一個清談節目，想搵威嫂做訪問，講吓孕婦辛酸，只得少少車馬費，威威哥同威嫂諗咗一陣最後都答應，因為擔心拒絕咗將來冇得返轉頭。
撰文：Jessie
【姐匙Talk】
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。