上季有「Big 6殺手」之稱嘅狼隊喺禮拜四歐霸盃外圍賽第2圈次回合，喺魯爾占美尼斯梅開二度下，作客4:1大勝北愛爾蘭嘅十字軍，兩回合以6:1殺入外圍賽第3圈，不過呢位墨西哥國腳之後勇戰受傷，暫時未知傷成點。至於中國國腳武磊效力嘅西甲球隊愛斯賓奴，同日作客3:1輕取史達蘭，但三個入波都同武磊無關。另外CS卡拉奧華大學體育會面對漢維特嘅次回合賽事，就發生咗啲小風波，雙方球員臨完場爆發衝突，球迷又掟雜物入球場，仲擊中咗球證個頭，要第四球證頂上。至於首回合有兩球領先優勢，由謝拉特帶領嘅格拉斯哥流浪，次回合作客0:0悶和盧森堡球隊尼達干，有驚無險晉級。