自今年二月林鄭政府推出送中條例之後，建制派並非鐵板一塊咁支持特區政府，商界一直反對，直至中聯辦以「內地勢力」介入，召集人大政協訓話之後，商界先至勉強歸邊，與其他建制派共同支持林鄭。有咁嘅背景，建制派嘅文宣一直散亂，輸晒畀民陣一夥，直至六月九日之後，建制派見到有過百萬人上街，知道宣傳慘敗，有啲氣急敗壞，大量文宣透過藍絲群組向社交媒體廣發，左丁山都收到唔少。但睇落呢，建制派文宣文字雖然流暢，但立論老套八股，反來覆去，不離（一）香港教育教壞學生，通識教育要廢除，（二）外國勢力介入，美國佬揼水畀泛民搞事，（三）李柱銘陳方安生黎智英係三大漢奸，妖言惑眾，煽動年輕人（四）野心份子搞顏色革命，意圖分裂中國，（五）遊行示威破壞本港經濟，嚇走遊客，搞死香港。
佔中時係講呢五樣，反送中又講呢五樣，五六年來建制派嘅論調與宣傳，並無寸進，毫無新意，邊度有人聽得入耳呀。在陸羽飲茶，經常見到七十幾八十幾歲嘅上一輩左派報紙元老齊集搞大食會，呢日又見到，於是諗起上世紀六十年代，一九六七年左派大暴動之前，呢班左報元老大約係二十幾三十歲，跟老一輩羅孚等辦報，好有活力，當年嘅暢銷報張並非「華僑」、「星島」、「工商」三大建制報，而係「正午報」、「新晚報」、「晶報」、「商報」，呢幾份報紙對香港普羅大眾好有影響力，當時係左報黃金年代。點解隨住中國勢力、經濟力愈來愈龐大，有的是錢，反而左報在本港萎縮，銷路不前，完全係自己人（左派）寫畀自己人（左派）睇，市民群眾當愛國報紙冇到呢！相信今天在陸羽飲茶嗰班左報元老見到咁嘅情況，會握腕三嘆，恨不得重出江湖也。左報編輯，一蟹不如一蟹，可能與思想僵化有關，當年周恩來負責境外事務，統戰手法靈活，與今天之僵化大大不同。鬼咩，依家習近平加緊控制思想，要求愛國人士聽黨話，跟黨走，不得妄議中央，人民不許有自由的精神，獨立的思想，於是愛國報紙主編千篇一律，上述五點念念有辭；再者，內地人大量來港加入愛國報紙，本地編採人員失勢，咪冇晒靈活性囉！既然文宣輸晒，「人民日報」海外版旗下政見解讀專欄「俠客島」最近惱羞成怒，索性殺氣騰騰，點名大罵「蘋果日報」及黎智英，人地以舉國之力搞宣傳，竟然不敵一張「蘋果日報」，肥佬黎真係飲得杯落咯！