歐洲各大聯賽下星期開始陸續開「咧」，足智彩除咗一早開咗英超冠軍賠率外，近日都開埋西甲同法甲，法甲就唔使講，巴黎聖日耳門係一面倒大熱，得1.02倍熱到透，次熱嘅里昂有6倍，第3熱門馬賽已經冷到25倍，值唔值得博真係見仁見智。另外西甲就係衞冕嘅巴塞隆拿大熱，得1.35倍，次熱皇家馬德里係2.9倍，不過睇番季前賽皇馬就唔多對辦，而巴塞簽入基沙文之後，前線又有啲人滿之患，加埋中後場又老一歲，保唔保持到唔知㗎，可能7倍嘅馬德里體育會（右）仲抵玩！