【娛樂人物】小學與李澤鉅同班陳啟泰未嘗窮滋味

【娛樂人物】小學與李澤鉅同班
陳啟泰未嘗窮滋味

陳啟泰於2001年主持《百萬富翁》,深入民心,不過去年為ViuTV拍劇集《Plan B》,飾演心狠手辣的黑幫大佬,一樣令人刮目相看。自小出身富貴之家的他,是父母萬千寵愛的孻仔。雖然一直生活無憂,但眼見父親生意失敗,令他深明置業的重要,有樓有安全感,也是一般香港人的寫照。
撰文︰祖李
攝影︰林德雄

陳啟泰受父親影響,只要賺到錢就買樓,現在生活無憂。

出身大富之家的陳啟泰,父親是生意人,一直住港島半山,未嘗過貧窮滋味。當年《百萬富翁》效應,令陳啟泰在兩、三年間就賺到兩個半山單位,一個出租,一個自住。他說:「就算爸爸後來生意麻麻,哥哥都供到我去外國讀書,所以我未捱過窮。但因為見證過爸爸由叱咤風雲到風光不再,爸爸係冇樓冇積蓄。所以我出嚟做嘢之後,第一件事就係置業,咁樣有安全感好多。」

談到父親,陳啟泰近日為香港開電視主持《守護香港的故事》,向父親致敬,可惜因連日來的警民衝突,令節目播出遙遙無期,他說:「其實個節目差唔多拍晒,但出唔出係佢哋決定。爸爸之前係輔警,佢對自己加入警隊好驕傲,爸爸以前會成日帶我哋睇佢燒槍、畢業禮,舊年我為警隊做咗個《百萬富翁》嘅宣傳節目,拜山時我喺墓前都有同爸爸講。」

有三個哥哥的陳啟泰,是家中的孻仔,也是父母最錫的兒子。

出世時生意最好

陳啟泰出身名校聖保羅男女小、中學,與城中富豪李嘉誠的兩個兒子李澤鉅及李澤楷同校。但陳啟泰坦言小時候不愛讀書,幸好是孻仔,未有受到名校催谷的壓力。他說:「我同李澤鉅同屆,小學同班,最記得係佢日日着長褲返學,嗰時我哋着短褲,佢係向校方特別申請。名校讀書係有壓力,但對我嚟講冇競爭,因為我一直成績好差!小學時中下,中學時下下,臨去外國前差啲升唔到班。」

父親生意最好之時,正是陳啟泰出世,家人覺得他「腳頭好」,因此集萬千寵愛在一身:「嗰陣阿媽冇打我,反而我啲阿哥就打到飛起,因為我十幾歲時,媽咪都四十幾,收火啦。」問到是否因小朋友難教不生育,陳啟泰說:「我唔鍾意小朋友,其次係小朋友好曳,應該講係99%嘅家長好曳,喺個𨋢度,黃太叫B仔嗌我叔叔,99.9%機會B仔唔嗌,而百分百黃太亦唔會糾正。」

陳啟泰當年主持《百萬富翁》令事業闖高峯,年賺七位數字。資料圖片

人生目標做車評

愛車的陳啟泰,學生時代已將部「錢七」成副引擎取出來,搬入地牢仆爛再翻新。曾是飛車一族的他,現在「降火」了,將汽車的熱情轉化:「我首次收錢幫網站做車評,係我人生大目標,我想做亞洲最專業嘅評車節目。」他說現時多搭地鐵:「我享受速度,但𠵱家唔會飆,年紀大喇,我其實鍾意改效率,例如架車一樣係2000cc,大家用5千蚊改裝,但我快過你慳油過你,呢啲係我𠵱家追求嘅嘢。」
服裝提供︰G2000