等到喇！阿仙奴禮拜四官宣以破球會轉會費紀錄，據報去到7,200萬鎊（約6.8億港元）嘅天價，由里爾簽入24歲翼鋒尼高拉斯比比（Nicolas Pepe），呢個科特迪瓦國腳會着起槍手嘅19號波衫，而且佢同槍手雙星拿卡錫迪、奧巴美揚相當熟絡，呢個鋒線「黑三煞」值得期待之餘，據報兵工廠喺下周四轉會窗閂前，仲想買多兩個後防呀！
今夏轉會窗紅人比比據報轉會費成7,200萬鎊，刷新2018年1月由多蒙特以5,738萬鎊買入奧巴美揚嘅隊史紀錄，但英媒就話有啲水份，事關槍手第1期只係要畀2,000萬鎊，尾數攤分未來四年慢慢找。比比上季踢足38場法甲射入22球，僅次巴黎聖日耳門球星基利安麥巴比，而且比比仲有11次助攻。
下周日對巴塞或上陣
主帥艾馬利對呢個新兵讚不絕口，佢相信比比可以帶畀球隊速度、力量同埋創造力，製造更多入球。比比就話，加盟前搵過同樣踢過阿仙奴嘅科特迪瓦名將高路托尼、謝雲奴畀意見咁話。比比禮拜四亦都即刻開操，喺健身房操體能，同埋踩吓草地射吓波，順便同班新隊友見面，比比喺球會專訪就話好想同兵工廠嘅法國兵合作，好似拿卡錫迪，同埋同佢一樣雖然來自非洲、但母語一樣係法文嘅奧巴美揚咁，呢兩個兵工廠前鋒就喺ig一齊做比比嘅招牌慶祝手勢嚟歡迎佢，可以預期黑三煞會係新季兵工廠嘅正選鋒線。下周日兵工廠就會喺甘柏盃作客巴塞隆拿，比比好可能會上陣，雖然佢俾人搵到17年9月上電視節目，曾經講過去英倫踢波只會揀車路士，不過家陣已經係真．槍手喇！
買完前面買後面
今夏兵工廠買入巴西18歲前鋒馬天連尼，又喺皇家馬德里借入西班牙中場丹尼施巴路斯，另外用2,700萬鎊買中堅威廉沙列巴，不過即刻借返畀聖伊天，家陣加埋比比仲未想收手，即將從些路迪簽入蘇格蘭新晉左閘基蘭泰亞尼，另外仲想買多個有經驗嘅中堅，相信用嚟代替好大機會離隊嘅梅斯達菲同隊長哥斯尼。
