【地產專題】「如果沙士有買樓就發達啦！」這句飄流網絡世界多年的葡萄友心聲，在現實世界中亦有買家成功實踐出來。趙先生不只在沙士時買樓賺人生第一桶金，還在2008年海嘯後買樓賺多次，16年來由單身漢變多仔公，兩房單位變四房豪宅。趙太說，一路走來純粹抱住買樓自住的需要，「一諗住炒樓就危險」，完全好彩，食正樓市狂升浪潮，最後更換樓至售價近2,300萬元的荃灣海之戀．愛炫美四房海景單位。
03年斥194萬買凱帆軒
趙生說人生買的第一層樓是長實（001）大角嘴凱帆軒，「當時2003年尾，樓市跌到最低位咁滯」，都驚低處未算低，但打算結婚，於是買入。「當時樓市好靜，售樓處無人，個個戴口罩。」
當年凱帆軒實用呎價5,000多元，趙生最終以約194萬元買入一個實用450方呎的兩房單位，「當時按揭可以借九成半，銀行借七成，發展商借兩成半，無壓測，銀行同發展商借晒畀你，首期5%即約10萬元。」他記得當時和趙太月入共逾兩萬元。
「未開始供二按，已經賣咗層樓。因為自己想出來做生意，層樓賺咗百零萬，筆數都好犀利，算係第一桶金。真係用好彩來形容，現時冇得擁有呢啲機會。」趙太說捨不得賣樓，但老公決定創業要「盲撐」。趙生說：「如果今日睇返，當時決定肯定係正確。你知做生意，有啲咩事可能由頭嚟過，呢個除咗好彩，都唔知點講啦！」他不諱言，太太工作穩定成為他的後盾。
08年擲200萬購浩景臺
2008年金融海嘯後，趙生經營生意不俗，於是以約200萬元買入葵涌浩景臺一個兩房單位。換言之，趙生在03年及08年樓市兩大低位入市，「因為若唔係低位，根本拎唔到錢出來。」隨住仔女陸續出世，兩房換三房，三房換四房，由浩景臺換入荃灣汀九翠景臺，2012年換長實荃灣昇柏山，但趙氏一家沒住過，因為屋企人口眾多，且為方便返工，就租住土瓜灣翔龍灣四房單位，昇柏山就放租。
兩年前，趙太稱：「我哋想住返屬於自己嘅屋，可以自己佈置。」最終他們以近2,300萬元買入荃灣海之戀．愛炫美一個實用1,162方呎的四房單位，笑言自己是「長實粉絲」，事關買過3層新樓都出自長實，「因為佢呎價真係實惠，始終其他樓盤呎價貴啲，見到都知道唔夠實力買」，「買咗三次長實樓，第一間住一年幾，好滿意，唔覺質素有問題，第二次（昇柏山）直情冇住過，可能今次（愛炫美）貴啲，但一睇個景，覺得值回一切。」
資深驗樓師賴達明驗收趙生單位，發現客廳地腳線有多處鬆脫令修口裂開、油漆多處沙眼、不平滑及難以解決的收水裂紋。轉入客廁打開浴室櫃板，除了沙石未清，更滿佈蜘蛛網。最大問題是在主人房套廁，漏水非來自企缸、洗手盆喉管，推開氣窗，驚現冷氣機去水喉「吊吊揈」，且有水滴出，相信是駁入主喉的較位甩掉。明哥相信，不排除工人坐吊車進行外牆維修時撞甩喉管。總括而言，單位來去水、門及浴室用具扣分最多，不過由於單位面積大，總分仍獲82分。
長實發言人回應，上述單位已收到樓宇接收核對表格，除玻璃項目需等待物料運抵才可更換外，其餘項目承建商已全部執修完工。
記者：陳家雄
