建國七十周年，內地選了牡丹為國花。趁國花未似得國歌兇巴巴立法，不妨批評一下。
共產黨徒不解溫柔，七十年來闊佬懶理，如今奔小康扮文明，牛嚼牡丹，都啱數。宋代大儒周敦頤《愛蓮說》總結得好：「菊，花之隱逸者也；牡丹，花之富貴者也；蓮，花之君子者也。」
當一個國家一個民族，進不能做君子，退不能做隱士，一味炫富，果然窮得只剩下錢了！支持者指，明、清兩朝已經共識牡丹為國花，那因為明清正值文化衰落期啊。
茉莉花、太陽花代表民主精神，諒中共唔敢掂，但梅蘭菊竹四君子、佛祖步步生蓮、涉江采（採）芙蓉的永恆思念、木棉春暖英雄樹、蒲公英到處播種，以至杜鵑啼血成花的矢志不渝，放着這麼多好東西不愛，偏選牡丹俗物，而且一人一票壓倒性，毋寧整體墮落。
梅，傲雪飄香，毛澤東都讚：「已是懸崖百丈冰，猶有花枝俏。」（詞作《卜算子》），但一早榮登中華民國國花，方丈小器，避避避。
菊，陶淵明詩：「採菊東籬下，悠然見南山。」寧靜致遠，但仇家日本號稱菊花皇朝，方丈小器，避避避。
蓮呢，再引《愛蓮說》：「出淤泥而不染，濯清漣而不妖，中通外直，不蔓不枝……」分明句句寫廉潔、不搞裙帶關係，崩口人忌崩口碗，令高幹及其子弟情何以堪呢？
世間叫阿梅、阿蘭、阿蓮以至芙、蓉、櫻、荷、杏、桃、芝、薇的女子何其多，父母起名總希望又靚又具意義。試問有人叫「牡」嗎？叫「丹」是指紅色，非關牡丹喎。根本，中國自古提牡丹的詩詞、成語都少，即時諗到係「牡丹花下死，做鬼也風流」，你話死唔死？
我說牡丹乃俗物，請看牡字，從牛從土，毫無美感，訴諸甲骨文，直頭是公牛、引申為雄性性器官之意，相對牝字便是雌性性器官，《金瓶梅》常常寫牡牝，把姦夫淫婦比喻為禽獸。然則，為什麼會拿來作「花名」？事關古人其實瞧不起牡丹，視為妖艷、霎眼嬌而已。
來來去去，牡丹只值一句「花之富貴者也」，想起江澤民「悶聲發大財」、習近平「抓緊機遇」，全國上下發錢寒，還談什麼理想？談什麼解語花？
淚眼問花花不語。